अनावश्यक रुपमा पारासिटामोल खरिद विक्री नगर्न औषधि व्यवस्था विभागको निर्देशन

काठमाडौं – ज्वरोको लागि प्रयोग हुने औषधि पारासिटामोल अनावश्यक खरीद र विक्री नगर्न उपभोक्ता र औषधि विक्रेतालाइलाई औषधि व्यवस्था विभागले सचेत गराएको छ । विभागले बुधबार सार्वजनिक सूचना जारी गरी अनुभवका आधारमा विक्रि र प्रयोग गर्न सकिने औषधि अधिक वा अनुचित प्रयोगले कडा खालको प्रतिकुलता असर पर्ने भन्दै त्यस्तो कार्य रोक्न सार्वजानिक सूचना जारी गरेको हो ।

विभागले कुनै पनि औषधि विरामीको आवश्यकता अनुसार सामान्य परिमाणमा रेकर्ड राखेरमात्र विक्रि-वितरण गर्न समेत चेतावनी दिएको छ । यदि विरामी पुर्जा तथा विलविजक विना त्यस्तो औषधि अनावश्यक रुपमा अत्याधीक विक्रिवितरण गरेमा कारवाही गर्ने समेत विभागले चेतावनी दिइएको छ ।

कोभिड १९ को संत्रास फैलिए संगै वजारमा सिटामोलको अनाधिकृत खरीद विक्री भएको गुनासो आएसंगै विभागले सचेतनाको सूचना जारी गरेको हो ।

विभागले नेपालमा कुनै पनि औषधिको अभाव नरहेको र आगामी दिनमा पनि अभाव हुने सम्भावना नरहेको समेत उल्लेख गरेको छ ।