विपी प्रतिष्ठानको सिट निर्धारण विवादमा नेपाल चिकित्सक संघले भन्यो–आन्दोलित हुने वातावरण नबनाउ

काठमाडौं-विदेशी विद्याथीलाई प्राथमिकता दिएर विपी कोइराला स्वास्थ्य विज्ञान प्रतिष्ठान धरान गरेको सिट निर्धारणप्रति नेपाल चिकित्सक संघले ध्यानाकर्षण भएको जनाएको छ । शनिबार संघका महासचिव डा. लोचक कार्कीले एक विज्ञप्ति जारी गर्दै आफूहरुको ध्यानाकर्षण भएको उल्लेख गरेका छन् ।

‘विपी कोइराला स्वास्थ्य विज्ञान प्रतिष्ठान धरानको तर्फबाट क्लिनिकल विषयमा गरिएको सिट निर्धारणका सम्बन्धमा प्रतिष्ठान सम्बन्धित जुनियर रेसिडेन्ट वेलफेयर सोसाइटीले असमान वितरण भएको भनी गरेको चिन्ताप्रति नेपाल चिकित्सक संघको ध्यानाकर्षण भएको छ,’ विज्ञप्तिमा भनिएको छ ।

साथै संघले चिकित्सक संघद्धारा पटक–पटक भएका आन्दोलन र त्यसका उपलब्धि स्वरुप नेपाल सरकारले गरेको सम्झौता र प्रतिवद्धताको परिधिभित्र रहेर नेपालको चिकित्सा शिक्षा अध्ययनरत विद्यार्थीको भावना र मर्ममा चोट नपुग्ने गरी सिट निर्धारण गर्न समेत माग गरेको छ ।

संघले विपी प्रतिष्ठानमा कार्यरत रेजिडेन्ट तथा सबै विद्यार्थीहरु आन्दोलित हुने वातावरण नबनाउन र आपसी समझदारीमा समस्या समाधान निकाल्न समेत आव्हान गरेको छ ।