डडेल्धुरा अस्पतालका चिकित्सकद्वारा वडाअध्यक्षसहित दुईजना विरुद्ध किटानी जाहेरी दर्ता

अमरगढी—डडेल्धुरा अस्पतालमा ड्युटीमा रहेका चिकित्सकमाथि भएको हातपातको घटनामा संलग्न भनिएका वडाध्यक्षसहित दुई जना विरुद्ध अस्पतालमा कार्यरत चिकित्सकहरुले किटानी जाहेरी दर्ता गराएका छन् । मंगलबार उनीहरुले अमरगढी नगरपालिका—११ का वडाध्यक्ष सुर्यप्रकाश खड्का र दिपक साउद विरुद्ध जिल्ला प्रहरी कार्यलयमा किटानी जाहेरी दर्ता गराएका हुन् ।

असार २५ गते मृतकको शव पोष्टमार्टमको विषयलाई लिएर वडाध्यक्ष खड्काको नेतृत्वमा आएको एक समूहले पोष्टमार्टममा संलग्न चिकित्सक डा। दिनेश उपाध्यायमाथि हातपात गरेको थियो । त्यसपछि चिकित्सकहरुले जिल्ला प्रशासनलाई आफ्नो सुरक्षाको प्रत्याभूति गर्न र आक्रमणमा संलग्नलाई कारवाहीको माग गरेका थिए ।

तर, प्रशासनले कुनै कदम नचालेपछि अस्पतालमा कार्यरत ९ जना चिकित्सकहरु अस्पताल छाडेर २७ असारमा सुदूरपश्चिम प्रदेशको हेडक्वार्टर रहेको कैलालीको धनगढी आएका थिए । धनगढीमा मुख्यमन्त्रीको सुरक्षाको आश्वासनसहित दोषीलाई कारवाही गर्ने प्रतिवद्धता जनाएपछि उनीहरु सोमबार डडेल्धुरा अस्पताल फर्किएका थिए ।

डडेल्धुरा पुगेका अस्पतालका चिकित्सकहरुले मंगलबार वडाध्यक्ष खड्का र साउदविरुद्ध किटानी जाहेरी दर्ता गराएका हुन ।