‘स्वास्थ्यकर्मीमाथि हुने आक्रमणविरुद्ध ऐन ल्याऊ’ भन्दै चिकित्सकको विरोध प्रदर्शन

काठमाडौँ – काठमाडौँ न्यूरो तथा जनरल अस्पतालका चिकित्सकहरुले चिकित्सकमाथि आक्रमण गर्नेलाई कारवाहीको माग गर्दै विरोध गरेका छन्। जोरपाटीस्थित नेपाल मेकिडल कलेजमा चिकित्सकमाथि भएको आक्रमणको घटनाविरुद्ध चिकित्सक तथा स्वास्थ्यकर्मीले बिहिबार अस्पताल परिसरमा आन्दोलन गरेका हुन्।

गएको जेठ १४ गते उपचार गराउन ल्याएका एक बिरामीको मृत्यु भएको थियो। सोही दिन चिकित्सकले लापरवाही गर्दा बिरामीको ज्यान गएको भन्दै मृतकका आफन्तले चिकित्सकमाथि हातपात गरेका थिए ।

‘चिकित्सकमाथि आक्रमण गर्नेलाई धरौटीविना जेल’, ‘दण्डहीनताको अन्त्य गर’, ‘स्वास्थ्यकर्मीमाथि हुने आक्रमणविरुद्ध ऐन ल्याऊ’ लेखिएको प्लेकार्ड बोकेर अस्पताल परिसरमै प्रदर्शन गरेका थिए।

उनीहरुले दोषीलाई कारवाही नभएसम्म आन्दोलन जारी राख्ने जानाएका छन्। कोरोनाको महामारीमा पनि ड्युटीमा खटिरहेका चिकित्सक तथा स्वास्थ्यकर्मीमाथि दुर्व्यवहार हुनु निन्दनीय भएको आन्दोलनमा उत्रिएका चिकित्सकहरुको गुनासो छ।