प्रयोगशालाबाटै ‘पोजेटिभ’ आएको कोरोना रिपोर्ट संक्रमितलाई दिन मन्त्रालयको आग्रह

काठमाडौँ – स्वास्थ्य तथा जनसंख्या मन्त्रालयले देशमा संचालित सबै प्रयोगशालालाई कोभिड परीक्षणको ‘रिपोर्ट’ केभिड जाँच गराउन आउने व्यक्तिलाई नै दिन आग्रह गरेको छ। आइतबार मन्त्रालयद्वारा आयोजित पत्रकार सम्मेलनमा बोल्दै प्रवक्ता डा. जागेश्वर गौतमले सम्बन्धित व्यक्तिलाई नै कोरोना पिसिआर रिपोर्ट  दिन अनुरोध गरेका हुन् ।

यसअघि कोरोना पोजेटिभ देखिएको संक्रमितको रिपोर्ट इपिडेमियोलोजी तथा रोग नियन्त्रण महाशाखा पठाउने र नेगेटिभ आएको रिपोर्ट मात्रै सम्बन्धित व्यक्तिलाई पठाउने गरेको प्रा. डा. गौतमले जनाए।

उनले भने, ‘पहिले संक्रमित देखिएको व्यक्तिलाई स्वास्थ्य सँस्थामा उपचारको लागि राख्ने व्यवस्था गरेका थियौं तर अहिले भने होमआइसोलेसनमै बस्ने प्रावधान थपेका छौं। धेरै संक्रमित घरमा आइसोलेसनमा बस्नु भएको छ। जसकारण सिधै प्रयोगशालाबाटै रिपोर्ट वितरण गर्न र गराउन अनुरोध गर्दछौ।’   इपिडिमियोलोजि तथा रोग नियन्त्रण महाशाखालाई कोरोना देखिएको संक्रमित व्यक्तिलाई सम्पर्क गरी व्यवस्थापन गर्न मन्त्रालयले निर्देशन दिएको प्रा. डा. गौतमले बताए ।