विराटनगर– कोरोना संक्रमण मुक्त भएकाहरूको प्लाज्मा संकलन गर्न विराटनगर महानगरपालिकाले ‘प्लाज्मा बैंक विराटनगर’ एप सञ्चालनमा ल्याएको छ । महानगरपालिकाका प्रमुख भीम पराजुलीले आफ्नो व्यक्तिगत विवरणसहित फोटो हालेर एप्सको शुभारम्भ गरेका हुन् ।
‘कोरोना संक्रमण भएर निको भएको दिनदेखि ३० दिनभित्र प्लाज्मा दान गर्न सकिने भएकाले दिने व्यक्तिले एपमा आफ्नो नाम, फोन नम्बर र रगत समूह उल्लेख गर्नुपर्ने हुन्छ,’ प्रमुख पराजुलीले भने, ‘संक्रमण मुक्त भएका व्यक्तिले यहाँ आएर प्लाज्मा दिन सक्छन् ।’
प्लाज्मा दिने व्यक्तिले एपमार्फत प्लाज्मा दिएको जानकारी गराउनुपर्ने महानगरपालिकाले जनाएको छ । इच्छुकहरुले गुगल प्ले स्टोरमा गएर प्लाज्मा बैंक विराटनगर डाउनलोड गर्न प्रमुख पराजुलीले आग्रह गरे ।
उनले कोरोना संक्रमित र अरु रोगका बिरामीहरुका लागि छिट्टै रक्तदान कार्यक्रम सञ्चालन गर्ने जानकारी गराए । कार्यक्रममा विराटनर महानगरपालिकाकी उप–प्रमुख इन्दिरा कार्की, प्रमुख प्रशासकीय अधिकृत इन्द्रमणि पोखरेल, जनस्वास्थ्य महाशाखा प्रमुख रमेश कार्की, जिल्ला जनस्वास्थ्य कार्यालयका प्रमुख ज्ञानबहादुर बस्नेतलगायतको उपस्थित रहेको थियोे ।
