डा. सन्दुक रुइतलाई ‘पद्यश्री गौरव’

काठमाडौं—वरिष्ठ नेत्र रोग विशेषज्ञ डा. सन्दुक रुइत ‘पद्यश्री गौरव पुरस्कार’बाट सम्मानित हुने भएका छन् । खेमलाल हरिकला लामिछाने समाज कल्याण प्रतिष्ठानले डा. रुइतलाई ‘पद्यश्री गौरव पुरस्कार’बाट सम्मानित गर्ने निर्णय गरेको छ ।

प्रतिष्ठानले यही वर्षबाट ‘पद्यश्री गौरव पुरस्कार’ स्थापना गरेको हो ।

‘दुर्गम हिमाली गाउँमा जन्मेर कठिन संघर्ष गर्दै नेत्रचिकित्सकीय क्षेत्रको सगरमाथा बन्न सफल रुइत अध्यारोमा रुमल्लिएका लाखौं जीवनलाई उज्यालो दिने मानवतावादी डाक्टर हुनुहुन्छ,’ प्रतिष्ठानका अध्यक्ष जीवा लामिछानेले जारी गरेको विज्ञप्तिमा छ ।

प्रत्येक वर्ष कोजाग्रत पूर्णिका दिन प्रदान गरिने यो पुरस्कारको राशि ३ लाख रुपैयाँ रहेको छ ।