उपप्रधान तथा गृहमन्त्री श्रेष्ठलाई ‘एक्युट मायोकार्डियल इन्फ्रयाक्सन’

काठमाडौं—चीन भ्रमणमा रहेका उपप्रधानमन्त्री तथा गृहमन्त्री नारायणकाजी श्रेष्ठलाई ‘एक्युट मायोकार्डियल इन्फ्रयाक्स’ भएको छ । बिहीबार श्रेष्ठको स्वास्थ्य अवस्थाबारे जानकारी दिदैं पेकिङ युनियन मेडिकल कलेज अस्पतालले उक्त जानकारी दिएको हो ।

‘एक्युट मायोकार्डियल इन्फ्रयाक्स’(मुटुको मासु अक्सिजन नपुगेर मर्न थालिसकेको अवस्था) हो । यो हर्ट अट्याककै अवस्था हो,’ कार्डियोभास्कुलर सर्जन डा. सन्जीतकुमार शाहले भने ।

अस्पतालकाअनुसार गृहमन्त्री श्रेष्ठ २ घण्टाजति छातीमा असहज महसुस भएपछि बिहीबार विहानै पेकिङ युनियन मेडिकल कलेज अस्पतालको इमर्जेन्सीमा भर्ना भएका थिए । त्यसपछि अस्पतालको क्याथ ल्याबमा उनको कोरनरी एन्जीयोग्राम गर्दा उनको लेफ्ट कोरनरी आर्टरीको अगाडिको शाखामा एकदमै नराम्रो ब्लकेज पाइएको थियो ।

अस्पतालकाअनुसार अहिले ब्लकेज भएको बायाँ धमनीमा स्टेन राखिएको छ । अहिले श्रेष्ठ अस्पतालको आईसीयुमा चिकित्सकहरुको निगरानीमा छन् । अस्पतालले उनको अवस्था स्थिर रहेको र अन्य भाइटल्ससमेत सामान्य भएको जानकारी दिएको छ ।