७१ लाख ७१ हजार नेपाली स्वास्थ्य बिमामा आवद्ध, २२ लाख परिवार स्वास्थ्य बिमामा जोडिए

काठमाडौं– नेपालमा स्वास्थ्य बिमा दायरामा आउने बिमितको संख्या बढेको पाइएको छ । आर्थिक वर्ष २०७९/८० मा कुल जनसंख्याको २४.५९ प्रतिशत मानिस स्वास्थ्य बिमामा जोडिएका छन् ।

स्वास्थ्य तथा जनसंख्या मन्त्रालयअन्तर्गतको स्वास्थ्य सेवा विभागले सार्वजनिक गरेको ‘नेपाल हेल्थ फ्याक्ट सिट २०२३’ का अनुसार आर्थिक वर्ष २०७९/८० सम्ममा ७१ लाख ७१ हजार ८४३ जनसंख्या स्वास्थ्य बिमामा आवद्ध भएको हो ।

यस अवधिमा स्वास्थ्य बिमामा आवद्ध हुने परिवारको संख्या ३९.१९ प्रतिशत अर्थात् २२ लाख १२ हजार ८ सय २७ पुगेको छ ।

विभागका अनुसार यस अवधिमा ३१ लाख १६ हजार ८ सय ७५ जना व्यक्तिहरु स्वास्थ्य बिमाको पहुँचमा पुगेका छन् भने ४३ लाख ९४ हजार ३ सय ९४ जनाले नवीकरण गरेर सेवा लिएका छन् ।