वीर अस्पतालमा ब्रेन ट्युमर विशेषज्ञ क्लिनिक सेवा सुरू

काठमाडौं—वीर अस्पतालमा ब्रेन ट्युमर विशेषज्ञ क्लिनिक सेवा सुरु भएको छ । अस्पतालका निमित्त निर्देशक डा. श्रवणकुमार थापाकाअनुसार बुधबारबाट वीरको राष्ट्रिय ब्रेन ट्युमर केन्द्रमार्फत उक्त सेवा सुरु गरिएको हो ।

ब्रेन ट्युमर विशेषज्ञ क्लिनिक सेवा हप्ताको दुई दिन आइतबार र बुधबार संचालन हुने उनले जानकारी दिए । उक्त सेवा विहान १० बजेदेखि १ बजेसम्म सर्जरी बहिरंग विभागमा संचालन हुनेछ ।

यस्तै, राष्ट्रिय न्यूरो स्पाइन केन्द्रमार्फत न्यूरो स्पाइन (मेरुदण्ड) क्लिनिक सेवा पनि वीर अस्पतालले सुरु गरेको छ , उक्त सेवा पनि साताको दुई दिन आइतबार र बुधबार विहान १० बजेदेखि १ बजेसम्म संचालन हुनेछ । टाउकोको ट्युमर र मेरुदण्ड दुखाइलगायतका रोगबाट पीडित बिरामीले राहत पाउने अपेक्षा अस्पतालको छ ।