बंगलादेशमा एमबीबीएस र बिडिएस पढिरहेका विद्यार्थीले बंगलादेशमै इन्टर्न गर्नुपर्ने

काठमाडौं—बंगलादेशका विभिन्न मेडिकल कलेजमा एमबीबीएस र बिडिएस अध्ययनरत विद्यार्थीले अब बंगलादेशमै इन्टर्न गर्नुपर्ने भएको छ । बुधबार शिक्षा, विज्ञान तथा प्रविधी मन्त्रालयले एक सूचना प्रकाशित गर्दै बंगलादेशमा अध्ययनरत मेडिकल कलेजले तोकेकै ठाउँमा इन्टर्न गर्नुपर्ने जनाएको छ ।

बंगलादेशको सुरक्षा असहजताका कारण त्यहाँका विभिन्न मेडिकल कलेजमा अध्ययनरत विद्यार्थीहरु स्वदेश फर्किएका थिए । त्यसपछि शिक्षा, विज्ञान तथा प्रविधी मन्त्रालयले उनीहरुको बाँकी रहेको इन्टर्न नेपालमै गराउन सकिने नसकिने विषयमा परराष्ट्र मन्त्रालयलाई लेखी पठाएको थियो ।

परराष्ट्रले ढाकास्थित नेपाली दूतावासमार्फत बंगलादेश सरकारका विभिन्न निकायहरुसँग समन्वय गर्दा बंगलादेशका मेडिकल कलेजहरुमा अध्ययरनत विद्यार्थीहरुले सोही कलेजले तोकेको ठाउँमा अध्ययन इन्टर्न गर्नुपर्ने पत्र परराष्ट्रलाई पठाएको थियो । सोहीअनुसार शिक्षा, विज्ञान तथा प्रविधी मन्त्रालयले बुधबार सूचना जारी गरेर जानकारी गराएको हो ।