मस्को—रसियाले क्यान्सर विरुद्धको mRNA (एआरएनए) भ्याक्सिन सन् २०२५ को सेप्टेम्बरमा उपलब्ध गराइने भएको छ । गमालेया नेशनल रिसर्च सेन्टर फर इपिडिमियोलोजी एण्ड माइक्रोबायोलोजीका निर्देशक अलेक्ज्याण्डर गिन्टसवर्ग आरटीसँगको अन्तर्वार्तामा भ्याक्सिन सन् २०२५ को सेप्टेम्बरको वरपर सार्वजनिक हुने दावी गरेका छन् ।
उनकाअनुसार रुसी वैज्ञानिकहरुले अर्को वर्ष जारी हुने ग्राण्डब्रेकिङ क्यान्सर भ्याक्सिनको कामलाई अन्तिम रुप दिइरहेका छन् ।
रसियाको समाचार पोर्टल तासकाअनुसार क्यान्सर विरुद्धको यो भ्याक्सिन निःशुल्क उपलब्ध गराइनेछ । रसियन स्वास्थ्य मन्त्रालयको रेडियोलोजी मेडिकल रिसर्च सेन्टरका महानिर्देशक एन्ड्रे काप्रिनलाई उदृद्ध गर्दै उसले यो भ्याक्सिन बिरामीहरुलाई निःशुल्क उपलब्ध गराइने उल्लेख गरेको छ ।
यो खोप विभिन्न अनुसन्धान केन्द्रहरुसँगको सहकार्यमा विकसित गरिएको हो । गिन्टसवर्गले ताससँग भ्याक्सिनको प्रि—क्लिनिकल ट्रायलमा ट्युमरको विकास र सम्भावित मेटास्टेसेसलाई दबाउने बताएका थिए ।
यसले ट्युमरको विकासलाई रोक्ने गरी प्रतिरोधी क्षमता विकास गर्ने र ट्युमरका सेलहरु नष्ट गर्ने बताइएको छ । यो खोप दिइएपछि बिरामीको प्रतिरक्षा प्रणालीले घातक कोषिकाहरुलाई नष्ट गर्ने गर्छ ।
गमालेया नेशनल रिसर्च सेन्टर त्यही केन्द्र हो, जसले सन् २०२० मा कोभिड—१९ विरुद्धको स्पुतनिक भी नामक खोप विकास गरेको थियो । जो कोभिड—१९ विरुद्ध विकास गरिएको संसारकै पहिलोमध्येको एक खोप थियो ।
