नेत्र ज्योति सम्मान पुरस्कार अतुल मिश्रलाई

काठमाडौं–नेपाल नेत्र ज्योति संघले नेपालहेल्थप्रेस डटकमका प्रधान सम्पादक अतुल मिश्रलाई ‘नेत्र ज्योति सम्मान पुरस्कार’ प्रदान गरेको छ । शुक्रबार संघको केन्द्रीय सभाको २९ औं अधिवेशनमा  उपप्रधानमन्त्री तथा सहरी विकास मन्त्री प्रकाशमान सिंह र स्वास्थ्यमन्त्री प्रदीप पौडेलले दोसल्ला ओढाउँदै  मिश्रलाई सम्मान पत्र प्रदान गरेका हुन् ।

विश्वकै सबैभन्दा ठूलो र सबैभन्दा बढी आँखा सम्बन्धी स्वास्थ्य प्रदायक संस्था रहेको नेत्र ज्योति संघले पहिलो पटक पत्रकारिताको माध्यमले आँखा स्वास्थ्य जनचेतना अभिवृद्धिमा उत्कृष्ट योगदानका लागि मिश्रलाई नगदसहित ‘नेत्र ज्योति सम्मान पुरस्कार’ प्रदान गरेको हो ।

सोसाइटी अफ हेल्थ केयर जर्नालिस्ट, नेपालका अध्यक्षसमेत  रहेका मिश्रले लामो समय कान्तिपुर दैनिकमा स्वास्थ्य विटमा कलम चलाएका थिए । उनी पछिल्लो सात महिनादेखि नेपालहेल्थप्रेस डटकममा प्रधान सम्पादक छन् ।