चार स्वास्थ्य विज्ञान प्रतिष्ठानको उपकुलपतिका लागि ५४ जनाको आवेदन (नामसहित)

काठमाडौं—चार वटा उपकुलपति रिक्त रहेका स्वास्थ्य विज्ञान प्रतिष्ठानको उपकुलपतिका लागि ५४ जनाको आवेदन परेको छ । मंगलबार उपकुलपति सिफारिस समितिले आवेदन दिन तोकेको समयसीमामा ५४ जनाको आवेदन परेको छ ।

जसमा सबैभन्दा बढी पोखरा स्वास्थ्य विज्ञान प्रतिष्ठानको उपकुलपतिका लागि १७ जनाले आवेदन दिएका छन् । यस्तै, कर्णाली स्वास्थ्य विज्ञान प्रतिष्ठानको उपकुलपतिका लागि १४ जनाले आवेदन दिएका छन् ।

विपी कोइराला स्वास्थ्य विज्ञान प्रतिष्ठानको उपकुलपतिका लागि १३ जनाको आवेदन परेको छ भने पाटन स्वास्थ्य विज्ञान प्रतिष्ठानको उपकुलपतिका लागि १० जनाले आवेदन दिएका छन् ।

आवेदन दिनेमा पूर्व स्वास्थ्य सचिव डा. रोशन पोखरेलदेखि चिकित्सा शिक्षा आयोगका पूर्व उपाध्यक्ष प्रा.डा. श्रीकृष्ण गिरीसम्म छन् । डा. पोखरेलले विपी स्वास्थ्य विज्ञान प्रतिष्ठानको भिसीका लागि आवेदन दिएका छन् भने डा. गिरीले कर्णाली स्वास्थ्य विज्ञान प्रतिष्ठानको भिसीमा आवेदन हालेका छन् ।