वीरगन्ज—पर्सामा फैलिएको हैजाका कारण नारायणी अस्पतालमा उपचारका लागि भर्ना हुने बिरामीको चाप तुलनात्मक रुपमा कम भएको चिकित्सकहरुले बताएका छन् । नारायणी अस्पतालका प्रवक्ता डा. उदय सिंहले तुलनात्मक रुपमा शुक्रबार बिरामीको चाप कम रहेको जानकारी दिए ।
‘तुलनात्मक रुपमा हिजोदेखि हैजाका बिरामीको चाप अस्पतालमा कम देखिन्छ,’ प्रवक्ता डा. सिंहले भने, ‘यसअघिजस्तो अहिले भुँइमा बिरामीको उपचार गर्नुपर्ने अवस्था छैन ।’
नारायणी अस्पतालमा हालसम्म हैजाका ३०२ जना बिरामी दर्ता भएका थिए । जसमध्ये २५० जना बिरामी उपचारपछि डिस्चार्ज भएका छन् भने ४९ जनाको अहिले पनि उपचार जारी रहेको छ । जसमध्ये गम्भीर प्रकृतिका ६ जना बिरामीको आईसीयुमा उपचार भइरहेको डा. सिंहले जानकारी दिए ।
हैजाका कारण भएको डिहाइड्रेसनलगायतका कारणले मिर्गौला बिग्रिएका दुई जनाको नारायणी अस्पतालमै डायलाइसिस भइरहेको उनको जानकारी दिए । पछिल्लो समय क्रमिक रुपमा गर्भवती महिला र बालबालिका उपचार लागि अस्पताल आउने संख्यामा समेत वृद्धि भएको छ ।
इपिडिमियोलोजी तथा रोग नियन्त्रण महाशाखा (इडिसिडी)को १२ भदौंको रिपोर्टअनुसार बारा र पर्सामा गरी हैजाका ६२४ केस रिपोर्ट भएका छन् । जसमध्ये ४३७ जना बिरामी निको भएर घर फर्किएका छन् भने बिहीबार साँझसम्म १८७ बिरामी उपचाररत छन् । इडिसिडीकाअनुसार पछिल्लो २४ घण्टामा ८४ जना बिरामीमा हैजा पुष्टि भएको छ ।
बिरामीहरुको बारा र पर्साका १४ भन्दा बढी अस्पताल तथा स्वास्थ्य चौकीमा उपचार भइरहेको छ ।
४ भदौंबाट वीरगन्जमा फैलिएको हैजाको स्रोत शुक्रबारसम्म पत्ता लाग्न नसक्नुलाई भने विज्ञहरुले चिन्ताका रुपमा लिएका छन् । ‘हालसम्म पनि हैजा संक्रमणको स्रोत पुष्टि भएको छैन । यो चिन्ताको विषय हो,’ डा. सिंहले भने, ‘स्रोत पुष्टि नहुँदा थप पानीजन्य रोगको रोगको जोखिम रहन्छ ।’
