विराटनगर—विराटनगर–१५ रानी आँखा अस्पतालमा पहिलो पटक चार महिनाकी नवजात शिशुको मोतियाबिन्दुको सफल शल्यक्रिया गरिएको छ । बुधबार भारतको पश्चिम बंगाल घर भएका दिनेश सरकारकी कान्छी छोरीको सफल शल्यक्रिया सम्पन्न भएको हो ।
अस्पतालका वरिष्ठ नेत्र रोग तथा कोर्निया विशेषज्ञ डा. अभिषेक सुवालको नेतृत्वमा रहेको चिकित्सक टोलीले आधुनिक फेको प्रविधि प्रयोग गरी शिशुको दुवै आँखामा शल्यक्रिया सम्पन्न गरेको हो । डा. सुवालका अनुसार नवजात शिशुको आँखामा जन्मजात क्याटयाक रहेको थियो, जसका कारण आँखाको दृष्टि विकासमा समस्या देखिएको थियो ।
दिनेश सरकारकी छोरी जन्मिएर करिब १५ दिन अगाडि उनका आमाबुबाले आँखाको सेतो भाग देखेपछि नजिकको अस्पतालमा लगेका थिए । त्यहाँ मोतियाबिन्दु भएको पत्ता लागेपछि उनीहरू विराटनगरस्थित रानी आँखा अस्पताल आएका थिए । चिकित्सकको परामर्शअनुसार बुधबार शल्यक्रिया गरिएको र बिहीबार शिशुलाई डिस्चार्ज गरिएको अस्पतालले जनाएको छ ।
डा. सुवालले भने, ‘चार महिनाको शिशुमा मोतियाबिन्दुको समस्या निकै दुर्लभ हुन्छ । समयमै उपचार नगरेमा दृष्टि नसामा क्षति पुग्ने, आँखा काम नगर्ने र स्थायी दृष्टिविहीनता आउने सम्भावना रहन्छ । त्यसैले हामीले तुरुन्तै शल्यक्रिया गर्ने निर्णय गरेका थियौं । अहिले शिशुको अवस्था सामान्य छ र दृष्टि विकासक्रम राम्रो भइरहेको छ ।’
शल्यक्रियापछि बालिकाको स्वास्थ्य सुधार राम्रो भएको र दुवै आँखाले प्रतिक्रिया दिन थालेको चिकित्सक टोलीले जनाएको छ । सफल उपचारपछि पिता दिनेश सरकार खुसी भएका छन् । उनले भने, ‘हाम्रो परिवारको सबैभन्दा सानो सदस्यको आँखाको समस्या देख्दा धेरै डर लागेको थियो । तर, डा. सुवाल र उनको टिमले जुन प्रकारले उपचार गरे, त्यसका लागि हामी अत्यन्त आभारी छौं । रानी आँखा अस्पतालले हाम्रो छोरीलाई नयाँ दृष्टि दिएको छ ।’
रानी आँखा अस्पतालको यो सफलताको उदाहरणले नवजात तथा बालबालिकामा देखिने आँखाका गम्भीर समस्या पनि नेपालमै उपचार सम्भव रहेको सन्देश दिएको छ । अस्पतालले २०८१ सालमा स्थापना भएदेखि नै आधुनिक प्रविधिद्वारा गुणस्तरीय नेत्र उपचार सेवा प्रदान गर्दै आएको छ । हाल वार्षिक करिब ६ हजारभन्दा बढी शल्यक्रिया यहाँ गरिन्छ भने दैनिक २ सयभन्दा बढी बिरामी ओपीडी सेवामा आउँछन् ।
बिरामीका बुवाआमा छोरीका साथ
अस्पतालमा नेपालका साथै भारतका विभिन्न राज्यबाट पनि बिरामी आउने गरेका छन् । अत्याधुनिक उपकरण र अनुभवी चिकित्सक टोलीका कारण रानी आँखा अस्पताल कोशी प्रदेशमा विश्वासिलो नेत्र उपचार केन्द्रका रूपमा स्थापित हुँदै गएको छ ।
यो पहिलो पटक नवजात शिशुमा गरिएको मोतियाबिन्दु शल्यक्रियाले अस्पतालको प्राविधिक क्षमता र सेवाको विश्वसनीयता अझ बढाएको छ । सफल उपचारले अस्पताललाई मात्र होइन, सम्पूर्ण कोशी प्रदेश स्वास्थ्य क्षेत्रमा नयाँ आशा र सम्भावनाको सन्देश दिएको छ ।
