काठमाडौं—सरकारले आन्दोलनरत नर्ससहितका स्वास्थ्यकर्मीहरुको पारिश्रमिक सम्बन्धी माग सम्बोधन गर्न १४ सदस्सीय समिति गठन गरेको छ । आइतबार स्वास्थ्य तथा जनसंख्यामन्त्री समेत रहेकी प्रधानमन्त्री सुशीला कार्कीले समिति गठन गरेकी हुन् ।
स्वास्थ्यका अतिरिक्त सचिव डा. श्रीकृष्ण श्रेष्ठको नेतृत्वमा १४ सदस्सीय समिति गठन भएको मन्त्रालयका प्रवक्ता डा. प्रकाश बुढाथोकीले जानकारी दिए । ‘नर्सलगायतका स्वास्थ्यकर्मीहरुको पारिश्रमिक सम्बन्धी माग सम्बोधन गर्न समिति गठन भएको छ,’ उनले भने, ‘शुक्रबार टिप्पणी उठेर आज समिति गठनको मन्त्रीस्तरीय निर्णय भएको हो ।
प्रवक्ता डा. बुढाथोकीकाअनुसार समितिमा मन्त्रालयको नर्सिङ महाशाखा, नेपाल नर्सिङ संघ, चिकित्सा शिक्षा आयोग, गृह मन्त्रालय, अर्थ मन्त्रालय, प्रधानमन्त्री कार्यलयलगातयका प्रतिनिधीहरु छन् ।
सरकारले तोकेको न्यूनतम पारिश्रमिक पाउनुपर्ने मागसहित देशभर नर्ससहितका स्वास्थ्यकर्मीहरु आन्दोलनरत छन् । कास्कीस्थित मणिपाल मेडिकल कलेज र गण्डकी मेडिकल कलेजमा नर्सहरुले सुरु गरेको श्रमशोषण विरुद्धको यो आन्दोलन अहिले सुदूरपश्चिम र कोशी प्रदेशसम्म फैलिएको छ ।
