काठमाडौं—प्रधानमन्त्री सुशीला कार्कीको क्याबिनेटमा थपिने चार मन्त्रीको नाम राष्ट्रपति कार्यालय शितल निवास पुगेको छ । राष्ट्रपति कार्यालय स्रोतकाअनुसार चार जना मन्त्रीलाई आजै सपथ गराउने गरी तयारी अगाडि बढाइएको छ ।
पूर्व स्वास्थ्य सचिव डा. सुधा शर्माको नाम स्वास्थ्य तथा जनसंख्या मन्त्रीका रुपमा राष्ट्रपति समक्ष सिफारिस गरिएको छ । ‘उहाँ (डा. सुधा)को नाम स्वास्थ्य तथा जनसंख्या मन्त्रीका रुपमा सिफारिस गरिएको लिष्ट हामी कहाँ आएको छ,’ राष्ट्रपति कार्यलय स्रोतले भन्यो, ‘उहाँहरुको आजै सपथ गराउने तयारी छ ।’
उनी नेपाल चिकित्सक संघ (एनएमए)को पूर्व अध्यक्षसमेत हुन् । प्रधानमन्त्री कार्कीले डा. शर्मासहित अन्य तीन जना गणपतिलाल श्रेष्ठ, खगेन्द्र सुनार र बब्लु गुप्तालाई पनि आफ्नो क्याबिनेटमा थप्ने तयारी गरेकी छन् । कार्की क्याबिनेट चार जना थपिएसँगै १२ सदस्सीय पुग्नेछ ।
नयाँ स्वास्थ्यमन्त्री डा. शर्माले भारतको राजेन्द्र मेडिकल कलेज राँची झारखण्डबाट एमबीबीएस गरेकी हुन् । उनले त्रिभुवन विश्वविद्यालय चिकित्साशास्त्र अध्ययन संस्थान (आईओएम)बाट डिजिओ गरेकी छन् भने बेलायतस्थित रोयल कलेज अफ लण्डनबाट फेलोसीप गरेकी छन् ।
डा. शर्माले त्रिभुवन विश्वविद्यालयबाट माष्टर्स अफ पब्लिक हेल्थमा गोल्ड मेडल हात पारेकी थिइन् ।
उनी दुई वर्ष परोपकार स्त्री तथा प्रसूति अस्पतालको रजिष्ट्रार भइन् भने १० वर्ष प्राध्यापक तथा चिफ कन्सल्ट्यान्टमा रुपमा काम गरिन् । एक वर्ष चार महिना प्रसूति गृहको निर्देशकका रुपमा पनि उनले काम गरिन् ।
डा. शर्माले सन् २००८ देखि २०११ सम्म तीन वर्ष तीन महिना स्वास्थ्य सचिवका रुपमा स्वास्थ्य मन्त्रालयको प्रशासनिक नेतृत्व गरेकी थिइन् । सरकारी सेवाबाट अवकास भएपछि उनले युनिसेफ र डिएफआईडीमा झण्डै ६ वर्ष काम गरिन् ।
डा. शर्मा पछिल्ला सात वर्षदेखि सिविक ट्राभल मेडिसिन सेन्टरको सह निर्देशकका रुपमा सक्रिय थिइन् ।
