नेपाल मेडिकल काउन्सिलको एक उपाध्यक्ष र ८ सदस्यको चुनाव गर्न निर्वाचन समिति गठन

काठमाडौं—नेपाल मेडिकल काउन्सिलले एक उपाध्यक्ष र ८ जना सदस्यहरुको चुनाव गराउन निर्वाचन समिति गठन गरेको छ । मंगलबार काउन्सिलले १ पुसबाट रिक्त हुन लागेको एक उपाध्यक्ष र ८ सदस्यको निर्वाचन गर्नका लागि निर्वाचन समिति गठन काउन्सिलका रजिष्ट्रार डा. सतिकुमार देवले जानकारी दिए ।

प्रा.डा. रविन्द्रमान श्रेष्ठ प्रमुख निर्वाचन अधिकृत रहेको निर्वाचन समितिमा प्रा.डा. ज्योतितारा मानन्धर र डा. विदुर अधिकारी निर्वाचन अधिकृत रहेका छन् । निर्वाचनबाट चुनिने काउन्सिलका एक उपाध्यक्ष र ८ सदस्यको कार्यकाल १ पुसमा समाप्त हुँदैंछ ।

उपाध्यक्षका लागि उम्मेदवार बन्न १५ वर्षको अनुभव हासिल गरेको दर्तावाला चिकित्सक हुनुपर्नेछ भने ८ सदस्यका लागि पाँच वर्षको अनुभव हासिल गरेको दर्तावाला चिकित्सक हुनुपर्नेछ । निर्वाचनका काउन्सिलमा दर्तावाला चिकित्सकले मतदान गर्न पाउने व्यवस्था छ ।

निर्वाचनबाट छानिने काउन्सिलका एक उपाध्यक्ष र ८ सदस्यको कार्यकाल चार वर्ष हुन्छ ।