काठमाडौं—त्रिवि शिक्षण अस्पतालका ग्यास्ट्रो तथा कलेजो प्रत्यारोपण सर्जन प्रा.डा. रमेशसिंह भण्डारी एलओडीमा गुन्जिने भएका छन् । शनिबार संसारको ४४ औं उत्कृष्ट क्बलभित्र अटाएको एलओडीमा डा. भण्डारी सांगीतिक प्रस्तुति दिनेछन् ।
एलओडीले ‘जब पेशा र रुचि भेटिन्छन्’ कार्यक्रममार्फत प्रा.डा. भण्डारीलाई विशेष सांगीतिक माहोलमा प्रस्तुत गर्न लागेको हो । प्रा.डा. भण्डारीसँगै रोशन श्रेष्ठ र टिमसँगै प्रस्तुती दिनेछन् । कार्यक्रममा लिजेन्डरी गितारिष्ट देव लामा पनि हुनेछन् भने कार्यक्रमको प्रस्तोताका रुपमा सन्जय सिलवाल रहेका छन् ।
कार्यक्रम दिउँसो तीन बजेदेखि साँझ ८ बजेसम्म सञ्चालन हुनेछ । सांगीतिक कार्यक्रमका लागि टिकट खल्ती एपमार्फत खरिद गर्न सकिने आयोजकले जनाएको छ ।
त्रिभुवन विश्वविद्यालय चिकित्साशास्त्र अध्ययन संस्थानका प्राध्यापक रहेका प्रा.डा. भण्डारी नेपालका अग्रणी कलेजो प्रत्यारोपण सर्जन हुन् । शिक्षण अस्पतालको सर्जिकल ग्यास्ट्रोइन्टेरोलोजी विभागका प्रमुख रहेका प्रा.डा. भण्डारीकै अगुवाईमा नेपालमै पहिलोपटक इन्डिपेन्डेट कलेजो ट्रान्सप्लाट भएको थियो ।
प्रा.डा. भण्डारी चिकित्सा कर्मसँगै सांगीतिक कर्ममा पनि सक्रिय छन् । उनका झण्डै आधा दर्जन गीत सार्वजनिक भइसकेका छन् । जसमा ‘निलो आकाश’, ‘तिम्रो नै माया लाग्छ’, ‘एउटा जीवन यस्तो थियो’, ‘कसरी भनुँ’, ‘मायालु भाका’, ‘तिमी नै तिमी’, ‘जीवन यो रहेसम्म’ र ‘निलो आकाश’लगायत रहेका छन् ।
२९ वर्षअघि एमबीबीएस अध्ययन गर्दा नै संगीत कर्म लागेका प्रा.डा. भण्डारीले सन् १९९६ मै पहिलो गीत ‘चिसो चिसो हावा चल्छ’ रेकर्ड गराएका थिए । त्यो गीत त्यहीबेला रेडियोमा पनि बजेको थियो ।
तर, बीचमा पढाइ, व्यस्तताजस्ता कारणले केही समय उनको संगीत यात्रा रोकिएको थियो । तर, पछिल्ला केही वर्षयता प्रा.डा. भण्डारी गायनसँगै, गीत रचना र कम्पोजिसनमा पनि सक्रिय छन् ।
