उज्वेकिस्तानमा एमबीबीएस अध्ययनरत तीन नेपाली विद्यार्थीलाई छात्रवृत्ति

काठमाडौं—उज्वेकिस्तानमा एमबीबीएस अध्ययन गरिरहेका तीन नेपाली छात्राले त्यहाँकोे एसिया इन्टरनेसनल युनिभर्सिटीमा छात्रवृत्ति पाएका छन् । विश्वविद्यालयले जारी गरेको विज्ञप्तीअनुसार इटहरीकी आकृति भुजेल र नुवाकोटकी नम्रता पाण्डेले शतप्रतिशत छात्रवृत्ति पाएका छन् ।

चितवनकी विशिका विकेले ७५ प्रतिशत छात्रवृत्ति पाएको विश्वविद्यालयले जनाएको छ । सो विश्वविद्यालयले प्रत्येक वर्ष प्रतिस्पर्धामा उत्कृष्ट हुने विद्यार्थीलाई छात्रवृत्ति प्रदान गर्दै आएको छ ।

यस वर्षको प्रतिस्पर्धामा एमबीबीएसतर्फ तीन नेपाली विद्यार्थी उत्कृष्टमा परेको विज्ञप्तीमा उल्लेख छ । उत्कृष्ट विद्यार्थीहरुलाई यस वर्षको ट्युसन शुल्क निःशुल्क हुनेछ ।

सो विश्वविद्यालयमा विभिन्न ११ देशका विद्यार्थी अध्ययनरत रहेका छन् । नेपालबाट मात्र २५ भन्दा बढी विद्यार्थी सो विश्वविद्यालयमा अध्ययनरत रहेको विश्वविद्यालयले जनाएको छ ।