काठमाडौं—सरकारसँग तीन बुँदे सहमतिपछि औषधी व्यवसायीहरुले आन्दोलनका कार्यक्रम फिर्ता लिएका छन् । मंगलबार काठमाडौंमा पत्रकार सम्मेलन गरेर राष्ट्रिय औषधी व्यवसाय संरक्षण समितिले सरकारसँगको सहमतिपछि आन्दोलनका कार्यक्रम फिर्ता लिएको जानकारी दिएको हो ।
राष्ट्रिय औषधी व्यवसाय संरक्षण समितिका संयोजक श्रीधर खनालकाअनुसार व्यवसायीहरुले राखेको औषधी ऐन, २०३५ को दफा ११ को उपदफा (३) संशोधन र उपदफा (५) खारेजी गर्नुपर्ने मागका सम्बन्धमा औषधी ऐन, २०३५ सम्बन्धित उपदफाहरुमा प्रचलित कानुनअनुसार संशोधनका लागि आवश्यक प्रक्रियाका लागि अधिकतम ३० दिनभित्र सहजीकरण गर्ने सहमति सरकारसँग भएको छ ।
यसैगरी, औषधी व्यवसायी संगठनका कानुनसँग सम्बन्धितबाहेकका मागहरु जस्तैः पुनः दर्तालगायतका विषय औषधी व्यवस्था विभागमार्फत सहजीकरण गर्ने सहमति भएको छ भने औषधी व्यवसायी संघको नेतृत्वमा गठित राष्ट्रिय औषधी व्यवसाय संरक्षण समितिले १५ मंसिरबाट आन्दोलनका कार्यक्रम फिर्ता गर्ने सहमति भएको छ ।
औषधी व्यवसायीहरु औषधी ऐन, २०३५ को दफा ११ को उपदफा (३) संशोधन र उपदफा (५) खारेज गर्नुपर्नेलगायतका माग राखेर झण्डै डेढ महिनादेखि आन्दोलनमा थिए । आन्दोलनमा रहेका औषधी व्यवसायीहरु, स्वास्थ्य मन्त्रालय र औषधी व्यवस्था विभागबीचको त्रिपक्षीय वार्तापछि मंगलबार सहमति बनेको हो ।
