जुम्ला— सिंजा गाउँपालिका–६ जोडुगाउँको आधारभुत स्वास्थ्य केन्द्र दाँतमा एक दिवसीय निःशुल्क स्वास्थ्य शिविर सम्पन्न भएको छ । कर्णाली स्वास्थ्य विज्ञान प्रतिष्ठान, प्लान नेपाल, पेस नेपाल जुम्लाको समन्वयमा सिंजा गाउँपालिका जुम्लाको आयोजना निःशुल्क स्वास्थ्य शिविर सञ्चालन गरिएको हो ।
कर्णाली स्वास्थ्य विज्ञान प्रतिष्ठान जुम्लाका उपकुलपति हाडजोर्नी रोग विशेषज्ञ डा. पुजन रोकायाको नेतृत्वमा गएको चिकित्सक तथा स्वास्थ्कर्मीहरुको टोलीले स्वास्थ्य परीक्षण गरेको हो ।
निःशुल्क स्वास्थय शिविरमा १५२ जना महिला र ११० जना पुरुष गरी २७२ जनाले सेवा लिएका छन् । शिविरमा १५२ जना महिलाको पाठेघर चेकजाँच गरिएको थियो ।
भिआईए ५५ जना, भिआईए पोजेटिभ २ जना र एक जनालाई कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा रिफर गरिएको उपकुलपति डा. रोकायाले बताए । उनले भने, ‘५ जना महिलाको पाठेघरमा रिङ पेसरी राखिएको छ,’ उनले भने ।
बालरोग सम्बन्धी ६५ जनालाई चेक जाँच भएको छ । जनरल स्वास्थ्य सेवा ५५ जनाले लिएका थिए भने ६५ जना किशोर—किशोरीलाई प्रजनन स्वास्थ्य र मानसिक स्वास्थ्य सम्बन्धी परापर्श सेवा प्रदान गरिएको थियो ।
