विराटनगर—विराटनगरस्थित नोबेल शिक्षण अस्पताल अगाडि सञ्चालित ७ वटा फार्मेसीमा नेपाल औषधी व्यवस्था विभागले शिलबन्दी गरेको छ। बिहीबार हेथआवाजले मित्र फार्मेसीले बिरामी ठगी गरेको समाचार प्राथमिकताका साथ प्रकाशित गरेको थियो ।
त्यसको प्रभावस्वरुप शुक्रबार भएको सघन अनुगमनका क्रममा बदमासी गर्ने ती फार्मेसीहरू शिलबन्दीमा परेका हुन्। जिल्ला प्रशासन कार्यालय मोरङ र औषधी व्यवस्था विभाग (डिडिए) विराटनगरको संयुक्त टोलीले शुक्रबार नोबेल अस्पताल आसपासका १४ वटा फार्मेसीमा आकस्मिक अनुगमन गरेको थियो। अनुगमनका क्रममा गम्भीर लापरबाही र बदमासी भेटिएपछि सात वटा पसलमा तत्काल ताला लगाइएको हो।
औषधी व्यवस्था विभाग विराटनगरका सूचना अधिकारी दिपेन्द्र खड्काका अनुसार शिलबन्दी गरिएका फार्मेसीहरूमा सीताराम फार्मेसी, छिन्नमस्ता फार्मेसी, धनगढी माई मेडिकल, सुसंस्कृति फार्मेसी र आविष्कार फार्मेसी रहेका छन्।
अनुगमनका क्रममा ती फार्मेसीहरूले बिना दर्ताका विदेशी औषधी बिक्री वितरण गर्ने गरेको, म्याद गुज्रिएका औषधीहरू राखेको र बिरामीको स्वास्थ्यमा गम्भीर खेलबाड हुने गरी अन्य अनियमितता गरेको पाइएको सूचना अधिकारी खड्काले जानकारी दिए।
‘विभिन्न संचारमाध्यमहरुमा फार्मेसीले बिरामी ठगेको समाचार सार्वजनिक भएपछि प्रशासन र विभागले यसलाई गम्भीर चासोको रुपमा लिएको थियो,’ सूचना अधिकारी खड्काले भने, ‘समाचारकै आधारमा गरिएको अनुगमनका क्रममा अधिकांश फार्मेसीहरूले मापदण्ड पालना नगरेको र बिरामी ठग्ने गरेको पुष्टि भएपछि हामीले शिलबन्दी गरेर थप अनुसन्धान सुरु गरेका छौं।’
मित्र फार्मेसीले बिरामीलाई आवश्यक नभएको औषधी भिडाएको र चर्को मूल्य असुलेर ठगी गरेको तथ्य उजागर गरेको थियो। समाचार आएको २४ घण्टा नबित्दै सरकारी निकायले एक्सन लिएपछि स्थानीय र बिरामीका आफन्तहरूले खुसी व्यक्त गरेका छन्।
प्रशासनले शिलबन्दी गरिएका फार्मेसी सञ्चालकहरूलाई थप कारबाहीका लागि औषधि ऐनअनुसार प्रक्रिया अगाडि बढाइने जनाएको छ।
