काठमाडौं—मीनभवनस्थित सुस्वास्थ अस्पताल दशौं वार्षिकोत्सव सम्पन्न भएको छ । बिहीबार एक कार्यक्रमकामाझ अस्पतालले १० औं वार्षिकोत्सव मनाएको हो ।
अस्पतालका अध्यक्ष अकुं सुदर्शन बस्नेतले अस्पतालले गत आर्थिक वर्षमा १ हजार ५ सय ५ जना बिरामीलाई सेवा दिएको जानकारी दिए । हरेक वर्ष स्वास्थ्य शिविरमार्फत ग्रामीण बस्तीमा निःशुल्क सर्वसाधारणलाई स्वास्थ्य सेवा उपलब्ध गराउँदैं आएको अस्पताले यस वर्ष दोलखाको कालिन्चोक ५ लापिलांगमा र शैलुङ गाउँपालिका—८ मा स्वास्थ्य शिविरमार्फत ६ सय ७६ जनालाई निःशुल्क सेवा दिएको छ ।
वि.सं. २०७२ मंसिरबाट निर्माण अगाडि बढेको सुस्वास्थ अस्पतालले २०७३ बैशाखदेखि आयुर्वेद तथा वैकल्पिक चिकित्सा विभागबाट १५ शय्याको प्राकृतिक चिकित्सा अस्पतालको रुपमा सञ्चालनमा आएको हो । १४ जना कर्मचारीबाट सुरु भएको सुस्वास्थ अस्पतालले पहिलो वर्षमै ८५३ जना बिरामीलाई सेवा दिएको थियो ।
यस्तै, दोस्रो वर्षमा ९०४, तेस्रो वर्षमा ९९२, चौथो वर्षमा ९९१, पाँचौं वर्षमा ७८०, छैटौ वर्षमा १०४६, सातौ वर्षमा १२३८, आठौं वर्षमा १२५७ र नवौं वर्षमा १४५१ जना नियमित बिरामीाई सेवा दिएको थियो । ‘यो १० वर्षमा हामीले १० हजार ९७७ जना बिरामीलाई सःशुल्क र ७ हजार २१० जना बिरामीलाई निःशुल्क उपचार सेवा प्रवाह गरेका छौं,’ अध्यक्ष बस्नेतले भने ।
अस्पतालले हाल फिजियोथेरापी, अकुपञ्चर, प्राकृतिक चिकित्सा सम्बन्धी ओपीडी र आईपीडी सेवा दिदैं आएको छ । अस्पतालमा मुख्यतयाः कम्मर दुख्ने, घुँडा दुख्ने, नसा च्यापिएको, गर्दन दुख्ने, जोर्नी दुख्ने र माइग्रेन सम्बन्धि रोगको उपचार हुँदै आएको छ ।
हाल अस्पतालमा दुई जना प्राकृतिक चिकित्सक, चार जना फिजियोथेरापिष्ट, दुई जना अकुंपञ्चरिष्ट, छ जना नर्स, आठ जना थेरापिष्ट, एक जना आधुनिक चिकित्सक र ११ जना अन्य कर्मचारीसहित ३४ जनाको टिम कार्यरत रहेको अध्यक्ष बस्नेतले जानकारी दिए ।
