काठमाडौं—सरकारले आजदेखि देशभरका पाठेघरको मुखको क्यान्सर विरुद्धको एचपीभी खोप दिन सुरु गरेको छ । स्वास्थ्य तथा जनसंख्या मन्त्रालयकाअनुसार २५ माघदेखि यो अभियान १५ फागुनसम्म चल्नेछ ।
अत्याधिक चिसो हुने हिमाली जिल्लाहरूमा चैत्र–वैशाखमा यो खोप अभियान सञ्चालन गरिने स्वास्थ्य मन्त्रालयले जनाएको छ । स्थानीय तहअनुसार समय र स्थान फरक हुने भएकाले नजिकैको विद्यालय वा स्वास्थ्य संस्थामा सम्पर्क गरेर खोप लगाउन भनिएको छ ।
पाठेघरको मुखको क्यान्सर लाग्न नदिन नजिकैको विद्यालय वा स्वास्थ्य संस्थाबाट खोप लगाइनेछ ।
कक्षा ६ मा अध्ययनरत सबै छात्राहरु र विद्यालयबाहिर रहेका १० वर्ष उमेरका किशोरीहरु, गत वर्ष खोप लगाउन छुटेका ७ देखि १० कक्षासम्मका छात्राहरु र विद्यालय नजाने ११ देखि १४ वर्षसम्मका छात्राहरुलाई खोप दिइनेछ ।
यो खोप पूर्ण रूपमा निःशुल्क दिइनेछ भने यो सुरक्षित छ। ‘यसले भविष्यमा हुने क्यान्सरको जोखिमबाट बचाउँछ,’ राष्ट्रिय स्वास्थ्य शिक्षा, सूचना तथा सञ्चार केन्द्रले भनेको छ ।
‘एचपीभी खोप एक मात्रा लगाए पुग्छ । यो शतप्रतिशत प्रभावकारी छ,’ केन्द्रले भनेको छ, ‘गत वर्षको एचपीभी खोप अभियानमा खोप लगाएकाहरुले यो वर्ष खोप लगाउनु पर्दैन् ।’
