जुम्ला—जुम्लाको हिमा गाउँपालिका–५ कालिकाखेतुस्थित प्रथामिक स्वास्थ्य केन्द्रमा सेवा प्रदान गर्दै आएका चिकित्सकले तलब भत्ता नपाएका गुनासो गरेका छन् । गत कात्र्तिक महिनादेखि प्रथामिक स्वास्थ्य केन्द्र कालिकाखेतु दुर्गम टाउँमा सेवा प्रवाह गर्दै आएका डा. आशिष प्याकुरेल र एक जना बीएन नर्सिङ कर्मचारी गरी दुई जनाले सेवा सुविधा नपाएका हुन् ।
चिकित्सकसमेतको दरबन्दी रहेको प्राथमिक स्वास्थ्य केन्द्रले करारमा भएपनि डाक्टर प्राप्त गरेको थियो । निर्वाध रुपमा सेवा प्रवाह गर्दै आएका चिकित्सकले समयमै सेवासुविधा तलब नपाउनु दुःखद् पक्ष हो । यस्ता समस्याले पुन दुर्गमका बिरामीले सहजै रुपमा चिकित्सकीय सेवा पाउन समस्या हुने देखिएको छ ।
छात्रवृत्ति करारमा सेवा प्रवाह गर्दै आएका स्वास्थ्यकर्मीले ४ महिनादेखि तलब भत्ता नपाएको गुनासो गरेका छन् ।
लामो समयसम्म तलब भत्ता नपाउँदा दुर्गममा बस्न र खर्च व्यवस्थापनमा समेत समस्या भएको डा. आशिष प्याकुरेलले बताए । उनले भने, ‘कर्णाली प्रदेश सरकार सामाजिक विकास मन्त्रालय हुँदै जनस्वास्थ्य कार्यालय जुम्लामार्फत छात्रवृत्ति करारमा सेवा प्रवाह गर्न थालिएको हो । दुर्गममा काम गर्ने भनेरै आएको हो । दुर्गमका बिरामीको सेवा गर्नु पर्दछ भन्ने मान्यता हो । तर, पाउने तलब भत्ता समयमा नपाउनु दुःखद पक्ष हो । सम्बन्धित निकायले समयमा सुनुवाई गरिदिनु पर्दछ ।’
जनस्वास्थ्य कार्यालय जुम्लालाई तलब सुविधाका लागि गुनासो गर्दा पनि समस्याको समाधान नभएको उनले बताए । ‘जनस्वास्थ्यलाई भन्दा प्रदेशबाट निकास आएको छैन भन्ने कुरा छ,’ उनले भने, ‘प्रदेशमा बुझ्दा केन्द्रबाट रकम निकासा नभएको भन्ने कुरा आउँछ । यसले सेवा प्रवाहमै समस्या पार्ने देखिएको छ ।’
सरदर दैनिक २०/२५ जना बिरामी प्राथमिक स्वास्थ्य केन्द्रमा उपचार गर्न आउने गरेका छन् । प्रसूति सेवासमेत प्रवाह गर्दै आएको प्राथमिक स्वास्थ्य केन्द्रमा जटिल किसिमका बिरामीलाई कर्णाली स्वास्थ्य विज्ञान प्रतिष्ठान जुम्लामा रेफर गर्ने गरिएको डा. प्याकुरेलले बताए ।
‘यहाँको एक्सरे मेसिन पनि लामो समयदेखि मर्मत नभएर थन्किएको छ । ल्याब सेवा चलेपनि केमिकलजस्ता कुरा समय नआउँदा उपचारमा पनि समस्या हुन्छ । चिकित्सकसँग सँगै आवश्यक औजार, उपकरण, मेसिन भएपछि बिरामीले छिटो—छरितो सेवा पाउने हुन्,’ उनले भने ।
कर्णाली प्रदेश सरकार, सामाजिक विकास मन्त्रालयका सुचना अधिकारी देवीप्रसाद पौडेलका अनुसार छात्रवृत्ति करारका चिकित्सकको तलब भत्ता संघीय सरकार स्वास्थ्य मन्त्रालयमार्फत निकासा आउने हो । ‘निकासा ढिला आएकोले समयमा तलब उपलव्ध नभएको हो,’ उनले भने, ‘हामीले कात्र्तिक महिनामै निकासा माग गरेका थियो ।’ उनले हाल रकम निकासा भएर आएको जानकारी दिए । ‘अर्थ मन्त्रालयमा रकम बाँडफाँड भएर यसै चैत महिनाको ७/८ गतेभित्रै रकम जिल्ला जिल्लामा जान्छ र चिकित्सकहरुले तलब भत्ता पाउने छन्,’ उनले थपे ।
