वीरेन्द्रनगर—नेपाल स्वयंसेवी रक्तदाता समाज सुर्खेत शाखाले कर्णाली प्रदेश सरकारसँग प्रदेशभर बिरामीलाई निःशुल्क रगत उपलब्ध गराउन माग गरेको छ । बुधबार सामाजिक विकासमन्त्री घनश्याम भण्डारीलाई ज्ञापनपत्र बुझाउँदैं समाजले प्रदेश सरकारसँग बिरामीलाई रगत निःशुल्क उपलब्ध गराउन माग गरेको हो ।
समाजले आगामी बजेटमा समेटिने गरी मानव जीवनको संरक्षण र स्वास्थ्य सेवाको आधारभूत अधिकार सुनिश्चित गर्ने सन्दर्भमा रगत जस्तो जीवनदायी तत्वको सहज र सुलभताका साथै निःशुल्क उपलब्ध हुन अत्यन्त जरुरी अनि अपरिहार्य विषय भएको जनाएको छ ।
कर्णाली प्रदेशजस्तो भौगोलिक दृष्टिले विकट तथा स्वास्थ्य सेवाको पहुँच सिमित भएको क्षेत्रमा रगतको अभावका कारण मृत्यु वरणको खबर सिर्जना हुनु दुःखद् भएको समाजले जनाएको छ ।
नेपाल स्वयंसेवी रक्तदाता समाज,सुर्खेत शाखाले प्रदेश राजधानीमा विगतदेखि नै निःस्वार्थ भावनाले रक्तदान अभियान सञ्चालन गर्दै र समन्वयकारी भूमिका निर्वाह गर्दै सेवा प्रदान गर्दै आएको छ । स्वयंसेवी रक्तदाताहरूको सक्रिय सहभागिताका बाबजुद पनि रगत संकलन, भण्डारण तथा वितरण प्रक्रियामा आर्थिक अभाव, पूर्वाधारको कमी र व्यवस्थापनको कमी कमजोरीका कारण सर्वसाधारण नागरिकले सहज रूपमा रगत प्राप्त गर्न सकिरहेका छैन । विशेषगरी विपन्न तथा दुर्गम क्षेत्रका नागरिकहरू रगतको शुल्क समेत तिर्न नसक्दा थप पीडित बन्न बाध्य छन् ।
नेपालको संविधानले प्रत्येक नागरिकलाई आधारभूत स्वास्थ्य सेवामा समान पहुँचको अधिकार सुनिश्चित गरेको छ । यसै सन्दर्भमा,कर्णाली प्रदेश सरकारबाट प्रदेशभरका सबै सरकारी तथा मान्यता प्राप्त स्वास्थ्य संस्थाहरूमा आवश्यक रगत तथा रक्ततत्वहरू निःशुल्क रूपमा उपलब्ध गराउने नीति तथा कार्यक्रम तत्काल कार्यान्वयन गर्न समाजले आग्रह गरेको छ ।
ज्ञापनपत्र बुझ्दै मन्त्री भण्डारीले आफूले रक्तदानका लागि केही काम गर्ने अठोट लिइरहेको समयमा समाजको झक्झक्याइले अझै काम गर्न उर्जा थपिएको बताए ।
त्यस्तै, नेपाल स्वयंसेवी रक्तदाता समाजका केन्द्रीय सदस्य एवं कर्णालीका सर्वाधिक रक्तदाता प्रवाशकुमार शाक्यले कर्णाली प्रदेशका दूरदराजमा रहेका नागरिकहरु त्यसै पनि आर्थिक अवस्था कमजोर रहेको र उहाँहरु बिरामी पर्दा रगतको जोहो गर्न पनि गाह्रो हुने भएकोले सरकारले आफ्ना नागरिक सहज रुपमा रगत उपलब्ध गरान सचेत गराउनका लागि ज्ञापनपत्र बुझाएको बताए ।
यस्तै, समाजका सुर्खेत शाखा अध्यक्ष अशोककुमार सिंहले वीरेन्द्रनगर नगरपालिकामा पनि एक वर्ष अगाडि पालिकाका नागरिकलाई निःशुल्क रगत उपलब्ध गराउन माग गरिएतापनि स्थानीय सरकारले चासो नदिएको बताए ।
