काठमाडौं—चितवनका फिजिसियन डा. भोजराज अधिकारीले नेपाली कम्युनिष्ट पार्टी छाडेको घोषणा गरेका छन् । शुक्रबार विहान फेसबुकमार्फत उनले समाजसेवामा अझ बढी मुखरित हुन राजनीतिक आवद्धताबाट निष्क्रिय भएको घोषणा गरेका हुन् ।
‘पेशागत क्षेत्रमा मेरो दक्षता र योगदानलाई अझ बढी समाजसेवामा मूखरित हुने गरी र यसैमा आगामी समय बढी समर्पित गर्ने गरी वर्तमान राजनीतिक आबद्धताबाट आजकै मितिले निष्क्रिय हुँदैंछु,’ डा. अधिकारीले भनेका छन्, ‘आजसम्मको राजनीतिक यात्रामा प्राप्त, ज्ञान, दर्शन र भूमिकाप्रति सम्मान छ।’
डा. अधिकारीले इतिहासबाट सिक्नुपर्ने बताउँदैं समकालीन समाजको सबैभन्दा अग्रगामी सोच र प्रशिक्षणबाट हुर्केकाले त्यो कालखण्डप्रति सम्मान रहेको समेत बताएका छन् । ‘तर, समय अब कुनै वादको आइडिओलोजीभन्दा विकासवादको प्रतिस्पर्धामा छ । पेशागत कर्मसँगै समाजसेवाका अन्य आयामबाट सचेत नागरिकको रूपमा योगदान दिने नै छु,’ उनले भनेका छन्, ‘राजनीतिक रुपमा म संलग्न सबै पद र सक्रिय दायित्वहरुबाट भने अलग हुने निर्णय गरेको छु।’
डा. अधिकारी लामो समय नेकपा माओवादी निकट थिए । कक्षा आठमा पढ्दै गर्दा अखिल क्रान्तिकारीको सदस्य भएको उनी ६२ सालमा माअोवादी पार्टीको सदस्य भएका थिए । उनले माओवादी पार्टीको स्वास्थ्य विभागको उपसंयोजक, नेपाल स्वास्थ्य अनुसन्धान परिषद्को उपाध्यक्ष, भरतपुर अस्पताल विकास समिति अध्यक्षका रुपमा पनि काम गरेका थिए ।
डा. अधिकारी वि.सं.२०७९ को निर्वाचनमा तत्कालीन माओवादी केन्द्रबाट चितवन—३ बाट प्रतिनिधिसभाका उम्मेदवार समेत बनेका थिए । तर, चितवन ३ मा राप्रपाका विक्रम पाण्डेसँग उनी पराजित भए ।
