भ्रष्टाचारको आरोपपछि डब्लुएचओको क्षेत्रीय प्रमुखबाट साइमा वाजेदले दिइन् राजीनामा

नयाँदिल्ली— भ्रष्टाचारको आरोप लागेपछि विश्व स्वास्थ्य संगठन (डब्लुएचओ) को दक्षिण–पूर्वी एसिया क्षेत्रीय प्रमुख साइमा वाजेदले पदबाट राजीनामा दिएकी छन् ।
बुधबार साइमाले तत्काल लागु हुने गरी पदबाट राजीनामा दिएको रोयटर्सले जनाएको छ ।

बंगलादेशकी अपदस्थ प्रधानमन्त्री शेख हसिनाकी छोरी साइमा विरुद्ध डब्लुएचओ र बंगलादेशका अधिकारीहरूले ठगी तथा अनियमिततासम्बन्धी अनुसन्धान गरिरहेका थिए ।

वाजेदले सन् २०२४ मा डब्लुएचओको दक्षिण–पूर्वी एसिया क्षेत्रीय प्रमुखको जिम्मेवारी सम्हालेकी थिइन् । उनको कार्यकाल पाँच वर्षको थियो ।

तर, सन् २०२५ को अन्त्यतिर डब्लुएचओले उनलाई प्रशासनिक कारण देखाउँदै बेतलबी बिदामा पठाएको थियो । डब्लुएचओले आगामी महिना वाजेदको स्थानमा नयाँ क्षेत्रीय प्रमुख चयन गर्न निर्वाचन प्रक्रिया सुरु गर्ने तयारी गरेको स्रोतलाई उदृत गर्दै रोयटर्सले जनाएको छ ।