काठमाडौं—केमोथेरापी उपचारका क्रममा औषधि रक्तनलीबाट बाहिर निस्किएर छालामुनिको तन्तु (Subcutaneous Tissue) मा चुहिने अवस्थालाई एक्स्ट्राभेसेसन भनिन्छ । यस्तो समस्या समयमै पहिचान र उचित व्यवस्थापन गर्न नसक्दा बिरामीको तन्तुमा गम्भीर क्षति पुग्न सक्ने भएकाले यसको रोकथाम तथा प्रभावकारी व्यवस्थापनबारे स्वास्थ्यकर्मीलाई प्रशिक्षित गर्ने उद्देश्यले नेपाल मेडिकल कलेजले एकदिने नर्सिङ वर्कशप आयोजना गरेको छ ।
‘Management of Extravasation of Chemotherapeutic Drugs’ विषयमा आयोजित उक्त वर्कशप नेपाल मेडिकल कलेजको नर्सिङ विभागको आयोजनामा सम्पन्न भएको हो ।
वर्कशपमा लेक्चरर पूजा प्रकाशले सहजीकरण गरेकी थिइन् । कार्यक्रममा केमोथेरापीका क्रममा हुने औषधि चुहावटका कारण, जोखिम, लक्षणको पहिचान, रोकथामका उपाय तथा यस्तो अवस्था सिर्जना भएमा अपनाउनुपर्ने तत्कालीन व्यवस्थापन प्रक्रियाबारे विषयगत प्रस्तुति र व्यावहारिक अभ्याससहित छलफल गरिएको थियो ।
विशेषगरी केमोथेरापी सेवा प्रदान गर्ने क्रममा नर्सिङ जनशक्तिले अपनाउनुपर्ने सावधानी, बिरामीको नियमित निगरानी, एक्स्ट्राभेसेसनको प्रारम्भिक पहिचान र समयमै आवश्यक उपचार तथा व्यवस्थापनका उपायबारे सहभागीहरूलाई जानकारी दिइएको थियो ।
यस किसिमका तालिम तथा कार्यशालाले नर्सिङ जनशक्तिको व्यावसायिक दक्षता अभिवृद्धि गर्नुका साथै बिरामीको उपचारलाई थप सुरक्षित र प्रभावकारी बनाउन सहयोग पुग्ने विश्वास कलेजले लिएको छ ।
कार्यक्रमका क्रममा नर्सिङ डाइरेक्टर सिर्जना पाण्डेले नर्सिङ विभागले अब नियमित रूपमा सीपीडी कार्यक्रम सञ्चालन गर्ने घोषणा गरिन् । उनले नर्सिङ जनशक्तिको ज्ञान, सीप र कार्यक्षमता निरन्तर अभिवृद्धि गर्न यस्ता व्यावसायिक विकाससम्बन्धी कार्यक्रमलाई प्राथमिकताका साथ अगाडि बढाइने बताइन् ।
नेपाल मेडिकल कलेजले स्वास्थ्य सेवाको गुणस्तर सुधार, बिरामीको सुरक्षा र स्वास्थ्यकर्मीको व्यावसायिक क्षमता विकासलाई केन्द्रमा राख्दै नियमित तालिम तथा शैक्षिक गतिविधिलाई निरन्तरता दिने जनाएको छ ।
