प्रधानमन्त्रीको स्वास्थ्यमा पूर्वराजाको चासो, स्वास्थ्य अवस्था बुझ्न पठाए दूत

काठमाडौं-एपेन्डिसाइटिसको शल्यक्रियापछि सघन उपचार कक्षमा उपचार गराइरहेका प्रधानमन्त्री केपी शर्मा ओलीको स्वास्थ्य अवस्थामा पूर्वराजा ज्ञानेन्द्र शाहले चासो राखेका छन् । निर्मलनिवास स्रोतकाअनुसार पूर्वराजाले प्रधानमन्त्रीको स्वास्थ्य अवस्था बुझ्न दूत पठाएका हुन् ।

पूर्वराजाको सन्देश बोकेर बिहीबार पशुपति महर्जन प्रधानमन्त्री ओली उपचार गराइरहेको मनमोहन कार्डियोथोरासिक भास्कुलर एण्ड टान्सप्लान्ट सेन्टर पुगेका हुन् । महर्जनले पूर्वराजाको तर्फबाट प्रधानमन्त्रीको स्वास्थ्य लाभको कामनाको सन्देश बोकेर गएका थिए ।
पूर्वराजाले स्वास्थ्य लाभको सन्देश पठाएको संवाद सचिव फणीराज पाठकले पुष्टि गरे ।

मंगलबार अपरान्ह प्रधानमन्त्री ओलीको एपेन्डिसाइटिसको शल्यक्रिया गरिएको थियो । अस्पतालले साँझ ७ बजे जारी गरेको विज्ञप्तिमा प्रधानमन्त्रीको सघन उपचार कक्षमा उपचार भैरहेको र स्वास्थ्य स्थिर रहेको जनाइएको छ ।