२०८१ असार ४, सोमबार
Health Aawaj logo
गृहपृष्ठकर्णाली प्रदेशकोरोना उपचारमा खटिएका कर्णाली प्रदेश अस्पतालका चिकित्सकको अनुभव

कोरोना उपचारमा खटिएका कर्णाली प्रदेश अस्पतालका चिकित्सकको अनुभव


कोरोना भाइरसको संक्रमण सम्पूर्ण मानव जातिलाई नै चुनौती दिइरहेको छ । दिनप्रतिदिन बढिरहेको संक्रमित र ज्यान गुमाउनेको संख्याले मानव अस्तित्वमै संकट उत्पन्न भएको हो । यस्तो जोखिमपूर्ण अवस्थामा विश्वभरका चिकित्सक, नर्सलगायत स्वास्थ्यकर्मीहरु आफ्नो जीवनको पर्वाह नगरी नागरिकको ज्यान बचाउनका लागि अग्रमोर्चामा खटिएका छन् ।

कर्णाली प्रदेशमा अहिले १ सय २३ जनामा कोरोना संक्रमण देखिएको छ । जसमध्ये ३२ जना कर्णाली प्रदेश अस्पतालको आइसोलेसन वार्डमा उपचार गराइरहेका छन् । जोखिम अवस्थामा आफूलाई होमेर कर्णाली प्रदेश अस्पतालमा पहिलो चरणमा कोभिड—१९ का बिरामीको सेवामा खटिएका चिकित्सकको अनुभव :

डा. प्रकाशराज ओली
मेडिकल अफिसर, कर्णाली प्रदेश अस्पताल, सुर्खेत

विश्वब्यापी रुपमा फैलिरहेको कोरोना भाइरस (कोभिड—१९) चीनको बुहानबाट अहिले संसारभर फैलिरहेको छ । त्यसलगत्तै कर्णाली प्रदेश अस्पतालले पनि कोरोना संक्रमितको उपचारका लागि तयारी अघि बढाएको थियो । अस्पतालमा हामी चिकित्सकहरुले कोरोनाको सामना गर्न तयारी थालिरहेका थियौ । कस्ता बिरामीलाई कसरी उपचार र हेरचाह गर्ने भन्नेबारे गाइडलाइन तयार गरेका थियौं ।

तर, यो भन्दा पहिले यस्तो प्रकारको भाइरससँग जुध्ने कुनै पनि अनुभव थिएन । अनुभव नभएकै कारण सबै ब्यवस्थापन पूर्णरुपमा भएको भने थिएन । जब ५ जेठमा दैलेखमा कोरोनाको पहिलो संक्रमित पत्ता लाग्यो । उहाँलाई सुर्खेत ल्याउने कि दैलेखमै राख्ने भन्नेबारे सम्बन्धित निकायसँग छलफल भयो । ९ जेठमा उहाँलाई सुर्खेतको प्रदेश अस्पताल ल्याउने तयारी भयो । कर्णालीको पहिलो संक्रमित देखिएलगत्तै हामीले पूर्णरुपमा तयारी सुरु गरेका थियौं । कसलाई कसरी खटाउने, उपचारलाई कसरी सहज बनाउनेलगायत सबै तयारी भयो । उहाँलाई सुर्खेत ल्याएकै दिन सुर्खेतको क्वारेन्टाइनमा रहेका चार जनामा पनि कोरोनाको संक्रमण भएको पुष्टि भयो ।

पहिलो चरणमा दुई जना नर्सलगायत पाँच जनाको टोली कोरोनाको उपचारमा खटिने निर्णय भयो । कोरोनाको उपचारमा खटिदा अहिलेको यो जोखिम अवस्थाले मनोवैज्ञानिक असर पनि उत्तिकै गर्ने रहेछ । डाक्टर भएको नाताले बिरामीको सेवा नै पहिलो दायित्व हो ।

सैद्धान्तिक रुपमा भन्दा त सजिलै हुन्छ तर व्यवहारमा गाह्रो रहेछ । पीपीई लगाएर बिरामीको उपचार गर्न जाँदा श्वास प्रश्वासमा अप्ठ्यारो हुने, टाउको दुख्ने, गर्मीले पसिना—पसिना हुने हुन्छ । संक्रमितको सम्पर्कमा गएर फर्केपछि पूर्ण सावधाधी अपनाएर पीपीई निकाल्नु पर्दछ । त्यसैले टिममा विश्व स्वास्थ्य संगठनको गाइडलाइनअनुसार एकले अर्कोलाइ सम्झाउने, सेनिटाइजरको प्रयोग गर्ने र पीपीई निकाल्दा एकले अर्काको विशेष निगरानी गर्ने गरेको छौं ।

अहिलेसम्म प्रदेश अस्पतालमा भर्ना भएका बिरामी सामान्य अवस्थामै छन् । हामीले चार—चार घण्टामा उहाँहरुको स्वास्थ्य अवस्था बारेमा जानकारी लिन्छौं । समय—समयमा फोन गर्ने र क्यामराबाट निगरानी गर्ने, खाना र खाजाको व्यवस्थापन गर्ने र औषधि खाने समयमा सम्झाउने, सरसफाइ गराउने गरिरहन्छौ । साथै, पत्रपत्रिका पढ्न दिएका छौं । बिरामीमा कुनै प्रकारको मनोवैज्ञानिक असर परेको छैन । सबैको साझा प्रयास र टिमवर्कका कारण नै हामी कोरोना विरुद्धको लडाइमा सहजता साथ काम गरिरहेका छौं ।उपचारमा खटिने स्वास्थ्यकर्मीहरु अस्पताल नजिकैको होटलमा क्वारेन्टाइनमा बस्छौं । सात दिनसम्म एउटा टिमले काम गर्ने र अर्को टिम क्वारेन्टाइनमा बस्ने तालिकाअनुसार काम भैरहेको छ ।

बिरामीको उपचारमा संलग्न भएदेखि घर परिवारसँग फोनबाटै कुरा हुन्छ । यो समयमा परिवारबाट चिन्ता व्यक्त हुन्छ । यदि म बाहिर केही सामान लिन गए र प्रदेश अस्पतालमा काम गर्छु भन्यो भने मबाट टाढा जाने अनि फरक व्यवहार गर्छन् । त्यसलाई मैले सकारात्मक रुपमा लिने गरेको छु ।

डा. लक्ष्मी रेग्मी
मेडिकल अफिसर, कर्णाली प्रदेश अस्पताल, सुर्खेत

अहिलेको अवस्था स्वास्थ्य क्षेत्रमै चुनौतीको अवस्था हो । यसले डाक्टरमा पनि एक प्रकारको त्रास र भय पक्कै सिर्जना गरेको छ । प्रदेश अस्पतालमा कोरोनाको संक्रमित बिरामीको उपचारमा खटिने हाम्रो टिम पहिलो हो । बिरामीलाई आइसोलेसन वार्डमा कुन बाटो ल्याउने, खाना कसरी दिने र बिरामीको निगरानी कसरी गर्ने भन्नेबारे अलमल भएपनि एक दुई दिनमै सबै कुराको व्यवस्थापन गर्न सकियो ।

हाम्रो टिम पनि उच्च मनोबल र दृढताका साथ कोरोना संक्रमितको सेवामा जुट्यौं । हामीले बिरामीको सेवा गर्ने भनेर नै जीवनको महत्वपूर्ण समय यस क्षेत्रमा डाक्टरको रुपमा बिताएका हौं । अस्पतालमा कार्यरत जिम्मेवार व्यक्ति र अन्य चिकित्सक एवं स्वास्थ्यकर्मीले हाम्रो मनोबल बढाएर कोरोनाको उपचारमा लाग्ने प्रेरणा दिइरहनु भएको छ । जसले गर्दा मनोवैज्ञानिक त्रास हुँदाहुँदै पनि बिरामीको सेवामा खटिन प्रेरणा मिल्यो ।

राज्यले यस्तो कठिन परिस्थितिमा सम्पूर्ण स्वास्थ्यकर्मीलाई मनोबल उच्च बनाउन आवश्यक भौतिक र नैतिक कुरामा जोड दिएर हौसला प्रदान गर्नुपर्छ । कोरोनाको उपचारमा खटिने स्वास्थ्यकर्मीलाई मात्र नभएर ओपीडिमा खटिने स्वास्थ्यकर्मीलाई पनि पीपीईको व्यवस्था गरेमा जोखिम कम हुने देखिन्छ ।


क्याटेगोरी : कर्णाली प्रदेश



तपाईको प्रतिक्रिया दिनुहोस


ट्रेण्डिङ