जुम्ला—साता बढी सञ्चालन भएको योग शिविरमा पुगेका डा. निलम खड्काले बिरामी बचाएका छन् । काठमाडौंको वीर अस्पतालका न्युरो सर्जन प्रा.डा. निलम खड्काले अस्पतालले रेफर गरिसकेका बिरामीको शल्यक्रिया गरेर ज्यान बचाएका हुन् ।
पातारासी गाउँपालिका–३ छुमगाउँका गोरबहादुर बोहोराको सफल शल्यक्रिया गरेका हुन् । १८ बैशाखमा घरको छतबाट लडेर घाइते भएका बोहोराको टाउकोमा गम्भीर चोट लागेको थियो ।
बेहोस अवस्थामा प्रतिष्ठान ल्याएर भेन्टिलेटरमा राखिएका उनको तत्काल न्युरो सर्जरी आवश्यक थियो । तर, प्रतिष्ठानमा न्युरो सर्जन नभएकोले अस्पतालले रेफर गर्ने तयारी गरेको थियो ।
तर, जुम्लामा जहाज आएन । कर्णाली स्वास्थ्य विज्ञान प्रतिष्ठानमा न्युरो सर्जन र आवश्यक उपकरण समेत छैनन् । टाउको सम्बन्धी गम्भीर बिरामी रेफर गर्नुको विकल्प छैन । गुठिचौर गाउँपालिकामा ध्यान शिविरका लागि न्युरो सर्जन प्रा.डा. खड्का जुम्ला आएका थिए ।
यसै बेलामा बिरामीलाई रेफर हुन नसकेपछि उनको शल्यक्रिया गरिएको हो । बिरामीको अवस्था देखेर डा. खड्काले उपकरणको अभावका बीचमा शल्यक्रिया गरेका हुन् । बिरामीको टाउकोमा जमेको रगत निकालिएको छ ।अहिले बिरामीको स्वास्थ्य अवस्था सुधार हुँदै गइरहेको अस्पतालले जनाएको छ ।
कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा भएको यो शल्याक्रिया अहिलेसम्मकै ठूलो हो । ट्रमा सेन्टर काठमाडौंमा समेत न्युरो सर्जनका रुपमा कार्यरत डा. खड्काले झण्डै सात घण्टा लगाएर शल्यक्रिया गरिएको बताए । आर्थिक रुपमा निकै विपन्न गोरबहादुर काठमाडौं पुगेर उपचार गर्न सक्ने अवस्थामा थिएनन् ।
अस्पतालमा न्युरो सर्जरीका लागि चाहिने उपकरण पनि थिएनन् । विगतमा नाक, कान र घाँटीको शिविरमा आएको टोलीले छोडेका सामग्रीको सहायताले शल्यक्रिया सम्भव भएको डा. खड्काले बताए । गुठिचौर गाउँपालिकामा १० दिने ध्यान शिविरका लागि आएका डा. खड्काले अस्पतालसँगको समन्वयमा शल्यक्रिया सफल भएको बताए । डा. खड्कासँगै डा. निर्मल थापा र इमर्जेन्सी वार्डका वरिष्ठ चिकित्सक रमेश काफ्लेलगायतको टोली शल्यक्रियामा संलग्न थियो ।
