जाजरकोटमा चिकित्सकमाथि हातपात, तीन जना पक्राउ

जुम्ला—कर्णाली प्रदेशको जाजरकोट जिल्ला बारेकोट गाउँपालिकामा रहेको प्राथमिक स्वास्थ्य केन्द्र लिम्सामा कार्यरत चिकित्सक नवीन सहानीमाथि हातपात भएको छ । शनिबार हातपात गर्ने गर्ने तीन जनालाई प्रहरीले पक्राउ गरेको छ ।

शुक्रबार राति चिकित्सक सहानीमाथि आक्रमण गरेको आरोपमा  प्रहरीले स्थानीय तिलक सिंह, चक्र बुढा र पदम नेपालीलाई पक्राउ गरेको हो ।

प्रमुख जिल्ला अधिकारी जनकराज पन्तले चिकित्सक सहानीमाथि स्यानीय व्यक्तिले आक्रमण गरेपछि प्रहरीले पक्राउ गरेको जानकारी दिए । ‘मदिरा सेवन गरी होहल्ला गरेर घटना घटेको अनुमान गरिएको छ,’ उनले भने, ‘चिकित्सक माथि आक्रमण हुनुको कारण अनुसन्धान पछि खुल्नेछ ।’

आक्रमणबाट घाइते चिकित्सक सहानीले अनुहारमा दुई वटा टाँका लगाइएको बताए । चिकित्सक सहानी नेपाल सरकारको छात्रवृत्ति कोटामा अध्ययन गरेर सरकारसँगको करारनामाअनुसार दुई वर्षका लागि प्राथमिक केन्द्र लिम्सामा कार्यरत छन् ।