जुम्ला – डोल्पाको जगदुल्ला गाउँपालिका – ३ का एक पुरुषको मृत्युपछि कोरोना पुष्टि भएकाले मलामी समेतको स्वाब संकलन गर्ने तयारी गरिएको छ । गाउँपालिका अध्यक्ष नाराखी रोकायाकाअनुसार मृतकका घरपरिवार, मलामी र अन्य क्वारेन्टाइनमा बसेका व्यक्तिको कोरोना परीक्षण गर्न स्वाब संकलन गर्ने तयारी गरिएको छ ।
मृतकका घरपरिवार र मलामीको सम्पर्कमा आएका गरी २९४ जनाको स्वाब संकलन गर्न तयारी गरिएको हो । अध्यक्ष रोकायाले भने, ‘स्वाब संकलनका लागि कर्णाली स्वास्थ्य विज्ञान प्रतिष्ठानको स्वास्थ्यकर्मीको टोली जुम्लाबाट हिडिसकेको छ । बेलुकासम्म यहाँ पुग्ने छन् ।’ त्यसैगरी डोल्पा सदरमुकाम दुनैबाट पनि स्वास्थ्यकर्मीको टोली गाउँपालिकामा आउने तयारी भएको उनले बताए ।
जगदुल्ला गाउँपालिका – ३ का ५८ वर्षीय पुरुष कोरोनाका कारण २१ जेठ होम क्वारेटाइनमा मृत्यु भएको थियो । शनिबार उनको रिपोर्टमा कोभिड-१९ पोजेटिभ आएपछि पीसीआर परीक्षणका लागि मलामी समेतको स्वाब संकलन गर्न थालिएको हो ।
मृतक पुरुषको मलामी गएका र मलामीको सम्पर्कमा आएका व्यक्तिहरूको स्वाब संकलन गर्न कर्णाली स्वास्थ्य विज्ञान प्रतिष्ठान जुल्लाबाट तीनजना स्वास्थ्यकर्मी जगदुल्ला गाउँपालिका गएको प्रतिष्ठानका रजिष्ट्रार विश्वराज काफ्लेले बताए ।
जगदुल्ला गाउँपालिका – ३ नम्बर वडा अहिले सिल गरिएको र गाउँपालिकामा कसैलाई पनि छिर्न नदिएको प्रमुख प्रशासकीय अधिकृत केशवराज जैसीले बताए । मलामी गएका सबै गाउँघरमै बस्ने गरेकाले संक्रमण गाउँपालिकाभरि फैलिएको हुने सक्ने स्थानीयले आँकलन गरेको छ ।
