जुम्ला—कोरोना संक्रमण पुष्टि भएर १४ दिन आइसोलेसनपछि जाँच गर्दा कोरोना नेगेटिभ देखिएर घर गएका तीन जनामा २५ दिनपछि पुनः पोजेटिभ देखिएको छ ।
जुम्लामा तीन जना व्यक्तिमा कोरोना संक्रमण देखिएको छ । संक्रमित भएका व्यक्तिहरु निको भएर आइसोलेसनबाट घर पठाइएको थियो । उनीहरुमा पुनः परीक्षण गर्दा कोरोना संक्रमण देखिएको हो ।
यसअघि कर्णाली स्वास्थ्य विज्ञान प्रतिष्ठान शिक्षण अस्पताल जुम्लाको आइसोलेसनमा रहेका ६९ जना नै निको भएर फिर्ता भएपछि जुम्ला कोरोनामुक्त जिल्ला घोषित समेत भएको थियो । तर, कोरोना संक्रमण निको भएर पठाएकै व्यक्तिमा पुनः परीक्षण गर्दा कोरोना भाइरस पोजेटिभ देखिएको छ ।
बाहिरबाट जुम्लामा भित्रिएकामध्ये ४ हजार ९ सय १२ जनाको पिसिआर परीक्षण गरिएको थियो । यसमा ६९ जनाको रिपोर्टमा कोरोना संक्रमण देखिएको थियो । संक्रमित सबैजना अहिले निको आइसोलेसनबाट पठाएकामध्ये तीन जनामा पुनः संक्रमण देखिएको सहायक प्रमुख जिल्ला अधिकारी ओमप्रकाश देवकोटाले बताए ।
उनले भने, ‘यस्ता घटना कमै मात्रमा देखिने गरेको छ । तराईका जिल्लामा यस्तो घटना भएका थिए, जुम्लामा पनि भयो ।’
निको भएर पठाएका व्यक्तिहरुलाई पनि पुनः आइसोलेसनमै राखिएको थियो । यस घटनाबाट कन्ट्रयाक टे«सिङ गर्नुपर्ने अवस्था छैन । त्यस्तै ५०२ जनाको आरडिटी परीक्षण भएको जनाएको छ ।
