वीरेन्द्रनगर—रुकुम पूर्वकी एक सुत्केरीको हेलिकप्टरमार्फत उद्धार गरेर कर्णाली प्रदेश अस्पताल सुर्खेत ल्याइएको छ । मंगलबार रुकुम पूर्व सिस्ने गाउँपालिका– ६ की २८ वर्षीया सरस्वती डाँगी विष्टको हेलिकप्टरमार्फत उद्धार गरेर सुर्खेत ल्याइएको हो ।
सुत्केरी हुन सोमबार रुकुम पूर्व अस्पतालमा आएकी विष्ट अप्रेसन गरेर बच्चा निकालिएको थियो । बच्चा निकालिसकेपछि पनि सालनाल नझरेपछि उनलाई नेपाली सेनाको हेलिकप्टरमार्फत सुर्खेत लगिएको रुकुम पूर्व अस्पतालका निमित्त मेडिकल सुपरिटेन्डेन्ट डा. जितेन्द्रराज कोइरालाले जानकारी दिए ।
‘उहाँ (विष्ट) सुत्केरी हुनको लागि हिजो अस्पतालमा भर्ना हुनुभएको थियो,’ उनले भने, ‘सुत्केरी व्यथा अघि बढ्न नसकेपछि उहाँलाई व्यथा लाग्ने औषाधी खुवाएका थियौं ।’
औषधि खुवाउँदा पनि उनको पाठेघर ३ घरभन्दा धेरै नखुलेपछि अप्रेसन गरेर बच्चा निकालेको डा. कोइरालाले बताए । बच्चा स्वस्थ जन्मिएको अस्पतालले जनाएको छ । तर, सुत्केरीको सालनाल नझरेको र रक्तस्राव पनि धेरै भएपछि उनलाई हेलिकप्टरमार्फत उद्धार गरिएको हो ।
उनको सालनाल पाठेघरलाई छेडेर जोडिएको अवस्थामा रहेको र यस्तो अवस्थामा पाठेघर नै निकाल्नुपर्ने भएको कारण रुकुम पूर्व अस्पतालमा यसका लागि आवश्यक स्रोत साधन नहुँदा रिफर गर्नुपरेको अस्पतालका नि. मेसु डा. कोइरालाले जानकारी दिए ।
