जुम्ला—हुम्ला जिल्ला अस्पतालमा बजेटको व्यवस्था नहुँदा औषधिको अभाव भएको छ । औषधि अभाव भएसँगै जिल्ला अस्पतालमा आउने सेवाग्राहीले सास्ती खेप्नु परेको हो ।
गत जेठदेखि जिल्ला अस्पतालमा औषधिको अभाव भएपछि सेवाग्राही रित्तो हात घर फर्कन बाध्य भएको स्थानीय धनदेवी सिराले गुनासो गरिन् । उनका अनुसार आफ्नो दुई वर्षीय छोरालाई ज्वरो आएको भन्दै जिल्ला अस्पतालमा जाँदा सामान्य सिटामोल समेत नपाएर फर्कनु प¥यो ।
नेपाल सरकारले निःशुल्क उपलब्ध गराउँदैं आएको पनि औषधि हुम्ला जिल्ला अस्पतालमा नभएको उनले बताइन् । सामान्य बिरामी स्थानीय सरकारका स्वास्थ्य शाखामै उपचार गरेपनि जटिल खालका बिरामी जिल्ला अस्पताल हुम्लामा जाने गरेका छन् । अस्पतालमा औषधि नपाउँदा रित्तै हात घर फर्कनुपर्ने बाध्यता रहेको छ ।
जिल्लास्थित सरकारी तथा गैरसरकारी कार्यालयका कर्मचारी, व्यापारी, उद्योगी, सिमकोट गाउँपालिका बाहेकका अन्य गाउँपालिकाका मानिसहरूको पनि बसोबास हुने भएकाले उनीहरु सिधै जिल्ला अस्पताल उपचार गर्न जाने गरेका छन् । उपचारका लागि जिल्ला अस्पतालमा सामान्य सिटामोल, जीवन जल, जुकाको औषधिसमेत नपाउँदा बाहिरका औषधि पसलमा किन्नुपर्ने बाध्यता रहेको सेवाग्राहीले गुनासो गरेका छन् ।
जिल्ला अस्पताल हुम्लामा औषधि व्यवस्थापनका लागि संघ, प्रदेश र स्थानीय सरकारलाई पटक—पटक माग पत्रसँगै सम्बन्धित व्यक्तिलाई औषधिका लागि बजेटको व्यवस्था गरिदिन अनुरोध गरेपनि संघ सरकारले प्रदेश सरकारलाई जिम्मा दिएको र प्रदेशले स्थानीय सरकारलाई जिम्मा दिएको भन्दै झारो टार्ने काम गरेको अस्पताल व्यवस्थापन समितिका अध्यक्ष दिपक भण्डारीको भनाइ छ ।
स्थानीय सरकारलाई भन्दा आफ्नो पालिकामै स्वास्थ्य शाखा भएकोले उक्त शाखामै औषधिको व्यवस्था गर्ने गरेकोले जिल्ला अस्पताललाई कुनै बजेटको व्यवस्था गर्न नसकिने प्रतिक्रिया दिएको अध्यक्ष भण्डारीले बताए ।
आर्थिक वर्ष २०८१/०८२ मा संघ सरकारबाट १० लाख रुपैयाँ बजेटको व्यवस्था गरिएपनि त्यो रकमले तीन महिनाभन्दा बढी नधान्ने स्वास्थ्य सेवा कार्यालय हुम्लाका प्रमुख उमाकान्त तिवारीले बताए ।
