काठमाडौं–नेपालमा पहिलो पटक कोरोना भाइरस कोभिड–१९ को ‘लोकल ट्रान्समिसन’ भएको पाइएको छ । शनिबार स्वास्थ्य तथा जनसंख्या मन्त्रालयले कैलालीकी एक स्थानीय ३४ वर्षीया महिलामा कोभिड–१९ देखिएको पुष्टी गरेसँगै नेपालमा कोरोनाको ‘लोकल ट्रान्समिसन’को पहिलो केस सत्तहमा आएको हो ।
जनस्वास्थ्य विज्ञहरुले यसलाई नेपालमा कोरोनाको पहिलो ‘लोकल ट्रान्समिसन’ भनेका छन् । डा. अनुराग उप्रेतीले आफ्नो फेसबुकमा नेपाल अब कोभिड–१९ को इपिडेमिकको दोस्रो स्टेजमा प्रवेश गरेको उल्लेख गरेका छन् । ‘हामी कोभिड–१९ इपिडेमिकको स्टेज २ मा प्रवेश गर्यौं,’ डा. उप्रेतीले लेखेका छन्, ‘कैलालीमा ३४ वर्षीया महिलामा संक्रमण (यसअघि कैलालीमा संक्रमित भेटिएका पुरुषको आफन्त ।’
शनिबार कोभिड १९ पोजेटिभ देखिएकी धनगढीकी महिला ७ चैतमा दुबईबाट नयाँदिल्ली हुँदैं काठमाडौं ओर्लिएका ३४ वर्षीया धनगढीका युवककी भाउजु हुन् । ७ चैतमा काठमाडौं ओर्लिएका ती युवा ८ चैतमा वुद्ध एयरमा नेपालगन्ज र त्यहाँबाट माइक्रोमा धनगढी अत्तरिया पुगेका थिए । त्यसपछि उनी स्थानीय गाडीमार्फत घर पुगेका थिए । घरमा २ दिनपछि १० चैतमा उनमा ज्वरो देखियो । ज्वरो देखिएपछि उनी ११ चैतमा उपचारका लागि सेती प्रादेशिक अस्पतालमा भर्ना भएँ ।
त्यहाँ भर्ना भएपछि चिकित्सकहरुले उनमा कोभिड–१९ का सम्भावित लक्षणहरु देखिएपछि थ्रोट स्वाब परिक्षणका लागि राष्ट्रिय जनस्वास्थ्य प्रयोगशाला टेकु पठाएका थिएँ । टेकु पठाइएको उनको स्वाब परिक्षण गर्दा १४ चैतमा उनमा कोभिड–१९ पुष्टी भएको थियो । त्यसको केही दिनपछि उनका परिवारका सदस्यहरुलाई पनि क्वारेन्टाइनमा राखियो । तर, क्वारेन्टाइनमा बस्न परिवारका सदस्यले गाह्रो भएको गुनासो गरेपछि होम क्वारेन्टाइन्टमा बस्ने घर पठाइएको थियो ।
२० चैतमा ती युवकका परिवारका सदस्यको थ्रोट स्वाब लिएर परिक्षणका लागि काठमाडौं पठाइयो । युएईबाट कोरोना संक्रमित भएर फर्किएका ती युवकीकी भाउजुमा उनलाई भेटेको १२ दिनपछि २२ चैत (आज) कोभिड–१९ संक्रमण पोजेटिभ देखिएको हो । यसले नेपालमा पनि कोभिड–१९ को संक्रमणको पहिलो ‘लोकल ट्रान्समिसन’ भएको देखिएको छ ।
विश्व स्वास्थ्य संगठनले पहिलो चरण बाहिरबाट फर्किनेहरुमा देखिने पचरणलाई भनेको छ । दोस्रो चरणलाई उसले ‘लोकल ट्रान्समिसन’ को चरण भनेको छ । जसमा बाहिरबाट आएका व्यक्तिहरुमार्फत आफ्नो परिवार र समुदायका व्यक्तिहरुमा कोभिड–१९ को संक्रमण फैलिने प्रवृत्ति रहेको छ ।
