विराटनगर–कोरोना भाइरस (कोभिड १९) शंकास्पद बिरामीको नमूना परिक्षणका लागि कोशी अस्पताल विराटनगरमा राखिएका ल्याबको प्रदेश नं. १ का मुख्यमन्त्री शेरधन राईले शुक्रबार निरिक्षण गरेका छन् ।
कोरोना भाइरसको कोशी अस्पताल विराटनगरबाट शंकास्पद व्यक्तिको नमूना परीक्षण सुरु गर्नुपूर्व मुख्यमन्त्री राई, सामाजिक विकास मन्त्री जीवन घिमिरेले ल्याबको निरिक्षण गरेका हुन् । विराटनगरबाट कोरोना परीक्षणका लागि आवश्यक तयारी सकिएपछि प्रदेश सरकारबाट ल्यावको निरिक्षण गरिएको हो ।
ल्याबको निरिक्षण गर्दै मुख्यमन्त्री राईले कोशी अस्पतालमा राखिएको ल्याब काठमाडौंपछिको ठूलो क्षमताको भएको बताए । उनले विराटनगरको ल्याबबाट दैनिक बढीमा २ सयसम्मको नमूना संकलन गर्न सकिने बताए । ‘भयको स्थिति भएकाले ढुक्क हुन पनि अधिकतम परिक्षणमा जानुप¥यो,’ उनले भने, ‘कोरोना परिक्षणलाई उच्च प्राथमिकतामा राखेर मेसिनहरु सञ्चालन गरिएको हो ।’
कोरोना परीक्षणका लागि आवश्यक उपकरणहरु र केमिकलहरु बिहिबार हेलिकप्टरबाट विराटनगर ल्याइएको थियो । कोशी अस्पताल विराटनगरकी मेडिकल सुपरीटेन्डेन्ट डा. संगीता मिश्राले सम्भवत शुक्रबार साँझदेखि परीक्षण सुरु गरिने बताइन् । ‘आज साँझदेखि परीक्षण सुरु सम्भव नभए भोलि विहानदेखि सुरु गर्छौ,’ उनले भनिन् ।
विराटनगरबाट गरिने कोरोना परीक्षणका लागि पहिलो चरणमा ६ सय जनाको नमूना संकलन गर्न पुग्ने केमिकल ल्याइएको वीर अस्पताल काठमाण्डौंका जेनेटिक साइन्टीस् तथा कोरोना परिक्षण विज्ञ समूहका बलराम गौतमले बताए ।
यसैबीच क्वारेन्टाइनमा बसेकाहरुको ¥यापिड डायग्नोष्टिक टेष्ट (आरडिटी)का लागि आज देखि प्रदेश १ का ४ स्थानमा टोली खटिएको छ । मोरङको टाँडी, झापाको मेचीनगर र भद्रपुर, सुनसरीको धरान र उदयपुरको बेलश्रोत क्वारेन्टाइनमा बसेकाको आरडिटीका लागि टोली प्रस्थान गरेको सामाजिक विकास मन्त्री जीवन घिमिरेले बताए । शुक्रबार र शनिबारमा प्रदेश १ का १४ वटै जिल्लामा रहेका क्वारेन्टाइनमा बसेकाको टेष्टका लागि आवश्यक सामान किट र पीपीई पठाइसकिने मन्त्री घिमिरेले वताए ।