काठमाडौं –उपप्रधान एवं स्वास्थ्य तथा जनसंख्यामन्त्री उपेन्द्र यादवले कर्णाली स्वास्थ्य विज्ञान प्रतिष्ठानलाई स्वास्थ्य सेवा, शैक्षिक सेवाका साथै देशकै नमुना अनुसन्धान केन्द्रको रुपमा विकास गर्नुपर्ने बताएका छन् । राजधानीमा शुक्रवार सुरु भएको प्रतिष्ठानको एमबीबीएस र बी फर्माको पाठ्यक्रम विकास कार्यशाला उद्घाटन गर्दै मन्त्री यादवले सो कुरा बताएका हुन् ।
प्रतिष्ठानले सो प्रदेशको स्वास्थ्य हब बन्न सक्नुपर्ने धारणा उनले राखेका थिए । राजधानी काठमाडौं हावा पानी, आवाजको अति प्रदुषित सहर बनिरहेको अवस्थामा कर्णालीमा एमबीबीएस र बी फर्मा, विशेषज्ञ चिकित्सको अध्ययन हुन थालेपछि विद्यार्थी त्यता आकर्षित हुने उनको भनाइ थियो । उनले स्वच्छ वातावरणका कारण पनि जुम्ला चिकित्सा शिक्षाका लागि उपयुक्त स्थान रहेको बताए । ‘सबै किसिमले प्रदुषित काठमाडौंभन्दा स्वच्छ हावापानी भएको जुम्ला सबैको रोजाइ हुन्छ,’ उनले भने, ‘सबैले आफ्नो जिम्मेवारी पूरा गराैं जुम्लामा एमबीबीएस पढाइ सम्भव छ ।’
नीति/निर्माताहरुले कर्णाली र प्रदेश दुईलाई जहिले पनि विकटताको सोचले मात्र हेरेर उपेक्षा गरेको आरोप उनले लगाए । ‘जबसम्म म कर्णाली पुगेको थिइन्, तबसम्म मेरो सोच पनि आम मानिसजस्तै थियो,’ मन्त्री यादवले भने ‘जब म त्यहाँ पुगेर आए, कर्णाली त सम्भावना नै सम्भावनाको ठाउँ रहेछ ।’ मन्त्री यादवले प्रतिष्ठानले त्यसक्षेत्रमा स्याटेलाइट अस्पताल सञ्चालन गरी सेवा दिनसके बिरामीको कमी नहुने बताए ।
स्वास्थ्य सचिव रामप्रसाद थपलियाले सबैले आफ्नो जिम्मेवारीअनुसार काम गरेमा मात्र प्रतिष्ठानको परिकल्पनाले साकार पाउने बताए । उनले प्रतिष्ठानको लागि मन्त्रालयले गर्नुपर्ने हर सहयोग उपलब्ध गराउने प्रतिवद्धता व्यक्त गरे ।
एमबीबीएस सम्भाव्यता अध्ययन कार्यदलका संयोजक प्रा.डा. श्रीकृष्ण गिरीले त्रिविले एमबीबीएस सुरु गर्ने अवस्थाभन्दा कर्णाली स्वास्थ्य विज्ञान प्रतिष्ठानको अवस्था धेरै राम्रो भएको हुँदा एमबीबीएस अध्ययनको लागि धेरै सम्भावना रहेको बताए ।
प्रतिष्ठानका उपकुलपति प्रा.डा. राजेन्द्र वाग्लेले एमडिजीपीको अध्यापन अनुमतिले आफूहरुलाई एमबीबीएस र बी फर्माको लागि हौसला मिलेको बताए । उनले कर्णाली प्रदेशका सबै अस्पतालसँग समन्वय गरेर प्रतिष्ठानले शैक्षिक कार्यक्रम अगाडि बढाउने बताए ।
