काठमाडौं—अवैध गर्भपतन गराएको अभियोगमा डा. शम्भुकुमार यादव पक्राउ परेका छन् । सिरहास्थित मिर्चैया नर्सिङ होममा कार्यरत डा. यादवलाई प्रहरी हिरासतमा राखी अनुसन्धान भैरहेको छ ।
सिरहाका प्रहरी प्रमुख प्रहरी उपरीक्षक उमाशंकर चतुर्वेदीका अनुसार, आइतवार जिल्ला अदालतबाट म्याद थप गरी हिरासतमा राखिएको हो ।
गत असार २३ गते सिरहा नगरपालिकाकी एक गर्भवती महिलाको अल्ट्रासाउण्ड (भिडियो एक्सरे)को परीक्षणबाट गर्भको लिंग पहिचान गरिएको थियो । त्यसलगत्तै डा. यादवले गर्भपतन गराउन सहयोग गरेको प्रहरीले दावी गरेको छ ।
ती महिलासँग १२ हजार रुपैंयाँ लिएर गर्भपतन गराएको प्रहरी उपरीक्षक चतुर्वेदीले बताए । गर्भपतन गराएकी महिलाको निरन्तर रक्तश्राव भैरहेपछि घटना सार्वजनिक भएको थियो । असार १८ गते मिर्चैया नर्सिङ होममा जँचाउन गएकी ती महिलाको नाम भने प्रहरीले सार्वजनिक गरेको छैन् ।
कस्तो अवस्थामा गर्न पाइन्छ सुरक्षित गर्भपतन ?
गर्भवती महिलालाई सुरक्षित गर्भपतन गर्न पाउने अधिकार कानुनमा रहेको छ । कस्तो अवस्थामा गर्भपतन गराउन पाइन्छ ? गर्भवती महिलाको मन्जुरीले १२ हप्तासम्मको गर्भ गर्भपतन गराउन सकिने कानुनी व्यवस्था रहेको छ ।
-गर्भपतन नगराए गर्भवतीको ज्यान जाने खतरा भएमा
– जन्मेर बाँच्न नसक्ने गरी गर्भको भु्रणमा खराबी देखिएमा
– एचआईभी वा त्यस्तै प्रकृतिको अन्य निको नहुने रोग लागेको महिलाको मन्जुरीमा २८ हप्तासम्मको गर्भ
– जबर्जस्ती करणी वा हाडनाताबाट करणीबाट गर्भ रहन गएमा महिलाको मन्जुरीले २८ हप्तासम्मको गर्भ
– विकलांग बच्चा जन्मन्छ भनी इजाजत प्राप्त चिकित्सकको राय भई महिलाको मन्जुरी भएमा २८ हप्तासम्मको गर्भ
