काठमाडौंका दुई सहित तीन जनाको कोरोनाका कारण मृत्यु भएको पुष्टि

काठमाडौं—नेपालमा कोरोना भाइरस (कोभिड—१९) का कारण तीन जनाको मृत्यु भएको पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमकाअनुसार काठमाडौंका दुई जना र सिन्धुपाल्चोकका एक जनाको कोरोना संक्रमणबाट मृत्यु भएको हो ।

काठमाडौं—१० शंखमुलका एक ६० वर्षीय पुरुषको २६ असारमा निधन भएको छ । फोक्सोमा पानी जमेको र मिर्गौला रोगका कारण स्वास्थ्यमा समस्या आएपछि उनी असार १६ गते पाटन अस्पतालमा भर्ना भएका थिए । उनमा १७ असारमा स्वाब परीक्षण गर्दा कोरोना पोजेटिभ देखिएको थियो ।

यस्तै, २५ असारमा काठमाडौं मेडिकल कलेजमा उपचारका क्रममा मृत्यु भएका ५४ वर्षका पुरुषमा पनि कोभिड—१९ पोजेटिभ देखिएको छ । काठमाडौंका गोकर्णेश्वर—४ घर भएका उनी मिर्गौलामा रोगका विरामी थिए । स्वास्थ्य समस्या आएपछि काठमाडौं मेडिकल कलेजमा भर्ना गर्दा श्वास प्रश्वासमा पनि समस्या देखिएपछि २१ असार उनको नमुना संकलन गरी परीक्षण गर्दा कोरोना पुष्टि भएको थियो ।

सिन्धुपाल्चोक पाँचपोखरी— ६ का ४५ वर्षीय पुरुषको २५ असारमा पाटन अस्पतालमा निधन भएको छ । १८ असार क्षयरोगको उपचारका लागि उनी पाटन अस्पतालमा भर्ना भएका थिए । उपचारका क्रममा कोरोना स्वाब परीक्षण गर्दा उनमा २२ असारमा कोरोना पोजेटिभ देखिएको थियो ।