टेकुस्थित स्वास्थ्य शिक्षा, सूचना तथा सञ्चार केन्द्रका जनस्वास्थ्य अधिकृत घुससहित पक्राउ

काठमाडौं–स्वास्थ्य तथा जनसंख्या मन्त्रालय अन्तर्गतको एक विभागका जनस्वास्थ्य अधिकृत घुससहित पक्राउ परेका छन् । सोमबार अख्तियार दुरुपयोग अनुसन्धान आयोगले टेकुस्थित राष्ट्रिय स्वास्थ्य शिक्षा, सूचना तथा सञ्चार केन्द्रका जनस्वास्थ्य अधिकृत रामअवतार गुप्तालाई घुससहित रंगेहात पक्राउ गरेको हो ।

अख्तियारका प्रवक्ता प्रदीपकुमार कोइरालाले गुप्तालाई बबरमहलस्थित वन विभाग परिसरबाट १ लाख घुससहित रंगेहात पक्राउ गरेको बताए । सातौं तहका अधिकृत गुप्ता जनचेतनामूलक सामाग्रीको कोटेसन पारिदिएवापत कमिसनका रूपमा मागेको घुस रकम बुझ्दैं गर्दा अख्तियारको फन्दामा परेका हुन् ।

उनलाई अख्तियारको टोलीले स्टीङ अप्रेसन गरेर पक्राउ गरेको हो । अहिले गुप्तामाथि थप अनुसन्धान भैरहेको प्रवक्ता कोइरालाले जानकारी दिए ।