डा.गिरीलाई उपाध्यक्ष बनाउनुको कारण पेश गर्न सर्वोच्चको आदेश

काठमाडौ–सर्वोच्च अदालतले डा. श्रीकृष्ण गिरीलाई राष्ट्रिय चिकित्सा शिक्षा आयोगका उपाध्यक्ष नियुक्ति गर्नुपर्ने कारण पेश गर्न आदेश दिएको छ । अधिवक्ता नरेश भट्टले उपाध्यक्ष हुनका लागि डा. गिरीको योग्यता नपुगेको हुँदा नियुक्ति खारेजी हुनुपर्ने माग गर्दै सर्वोच्चमा रिट दायर गरेका थिए ।

उनको रिट माथि सुनुवाई गर्दै न्यायधीस हरिकृष्ण कार्कीको एकल इजलासले उनलाई उपाध्यक्ष नियुक्ति गर्नुको कारण पेश गर्न चिकित्सा शिक्षा आयोग, शिक्षा मन्त्रालय र प्रधानन्त्री तथा मन्त्रिपरिषदको कार्यालयलाई आदेश दिएको छ ।

यसअघि डा. गिरीको योग्यताको विषयमा प्रश्न उठाउँदै हालिएको रिट अदालतका कर्मचारीले दरपिठ गरेका थिए । सो दरपिठ विरुद्ध फैसला गर्दै सर्वोच्चका न्यायधीसद्वय विश्वम्भरप्रसाद श्रेष्ठ र सुस्मलता माथेमाको संयुक्त इजलासले सुनुवाइ गर्न आदेश दिएको थियो ।

सो फैसलासँगै डा गिरी माथिको योग्यताको विषयमा अदालतमा मुद्धा परेको थियो ।