२०८१ असार ११, सोमबार
Health Aawaj logo
गृहपृष्ठसमाचारस्वास्थ्य मन्त्रालयका कोरोना संक्रमित होम आइसोलेसनमा, ‘पहुँचवाला’ शंकास्पद होटल क्वारेन्टाइनमा

स्वास्थ्य मन्त्रालयका कोरोना संक्रमित होम आइसोलेसनमा, ‘पहुँचवाला’ शंकास्पद होटल क्वारेन्टाइनमा


काठमाडौं—कोरोना संक्रमण पुष्टि भएका स्वास्थ्य तथा जनसंख्या मन्त्रालयमा कार्यरत कर्मचारीलाई होम क्वारेन्टाइनमा पठाएर उनीहरुको सम्पर्कमा आएका अन्य शंकास्पद पहुँचवाला व्यक्तिलाई भने होटल क्वारेन्टाइनमा पठाइएको छ । पहुँच नभएकाहरुलाई भने होम क्वारेन्टाइनमा बस्न भनिएको छ ।

संक्रमितमध्ये एक जनालाई मात्र अस्पताल पठाएर अन्य सबैलाई होम आइसोलेसनमा पठाइएको हो ।

संक्रमितहरुको क्लोज कन्ट्रयाकमा आएका सबैलाई क्वारेन्टाइनमा पठाइएको मन्त्रालयका प्रशासन महाशाखाका प्रमुख रघुराम विष्टले जानकारी दिए । उनले रोजाइमा होम क्वारेन्टाइन र होटल क्वारेन्टाइनमा पठाइएको बताए । ‘निर्देशिकाअनुसार जसले जे रोज्नुभयो, त्यहीअनुसार पठाइएको हो,’ उनले भने, ‘कतिपय होम क्वारेन्टाइनमा जानुभयो । कतिपय होटल क्वारेन्टाइनमा जानुभयो ।’

संक्रमितको सम्पर्कमा आएका भनिएका स्वास्थ्य राज्यमन्त्री नवराज रावत पनि होम क्वारेन्टाइनमा बसेका छन् । उनले आफू होटलमा बस्दा सुरक्षाकर्मीलगायत धेरै बस्नुपर्ने भन्दै आफू होम क्वारेन्टाइनमा बसेर परिवारलाई होटल क्वारेन्टाइनमा पठाएका हुन् । ‘मन्त्रीज्यू होटल क्वारेन्टाइन बस्दा धेरै जना बस्नुपर्ने भयो,’ सह—सचिव विष्टले भने, ‘त्यही भएर उहाँलाई होम क्वारेन्टाइन राखेर उहाँको परिवारलाई पठायएको हो ।’

मन्त्रालयले ऐच्छिक रुपमा होम क्वारेन्टाइन र होटल क्वारेन्टाइन बस्न भनेको बताए पनि केही कर्मचारीले भने पहुँचका आधारमा होटल क्वारेन्टाइन बस्नेहरुको लिष्ट तयार गरेको आरोप लगाएका छन् । होम क्वारेन्टाइनमा रहेका एक कर्मचारीले पहिले आफूहरुलाई होम क्वारेन्टाइन बस भनेर पठाएको तर पछि पहुँचवाला कर्मचारीहरुलाई होटलमा पठाइएको गुनासो गरे । ‘घरमा दुई कोठा छन् । एउटामा अरु सबै परिवार कोचिएर बसेका छन्, म अर्को कोठामा क्वारेन्टाइनमा बसेको छु,’ हेल्थ आवाजसँग ती कर्मचारीले गुनासो गर्दै भने ‘हामीलाई होम क्वारेन्टाइन बस्नु भन्दै पठाए । तर, पावर भएकाहरु सबै होटल गएछन् ।’

कतिपय संक्रमितको सम्पर्कमा आएका कर्मचारीहरु नियमित काममा पनि आइरहेका छन् । हिजोमात्र संक्रमितको सम्पर्कमा रहेका एक कर्मचारीले हेल्थ आवाजसँग भने, ‘हामीलाई त अफिस बोलाएर काम गर्न भनिएको छ । काम गरिरहेका छौं ।’


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ