काठमाडौं– नेपालमा कन्भालेसेन्ट प्लाज्मा थेरापी तीनजना कोरोना संक्रमितमा परीक्षण गरिएको छ । अन्य २ जनामा गर्ने तयारी छ ।
प्लाज्मा थेरापी गरिएका तीनजनामध्ये एक जना पूर्ण रुपमा निको भएर घर फर्किएका छन् भने एकजनाको उपचारकै क्रममा रहेका छन् । प्लाज्मा थेरापी गरिएकामध्ये अर्का एकजनाको भने मृत्यु भएको स्रोतले जनाएको छ । मेडिसिटी अस्पतालमा पाँच दिनअघि प्लाज्मा थेरापी गरिएका कीर्तिपुरका ६३ वर्षीय पुरुषको सोमबार मृत्यु भएको हो ।
हेल्थ आवाजलाई प्राप्त सूचनाअनुसार अन्य २ व्यक्तिहरुमा पनि प्लाज्मा थेरापी गर्ने तयारी भैरहेको छ ।
नेपालमा पहिलोपटक प्लाज्मा थेरापी विधिबाट उपचार गरी निको हुने संक्रमित विराट मेडिकल कलेजका सञ्चालक डा. ज्ञानेन्द्रमान सिंह कार्की हुन् । उनको १५ साउनमा त्रिवि शिक्षण अस्पतालमा प्लाज्मा थेरापी गरिएको थियो ।
कोभिड–१९ को हालसम्म कुनैपनि औषधि पत्ता लागेको छैन । जसका कारण विश्वका केही ठाउँमा कोरोना संक्रमणबाट गम्भीर भएका बिरामीहरुलाई यो विधिबाट उपचार गर्ने गरिएको छ । यो उपचार पद्धतीमा निको भैसकेका कोरोना संक्रमितको प्लाज्मा गम्भीर कोरोना संक्रमित बिरामीलाई दिइन्छ ।
