नोबेलका चिकित्सकसहित थप चार जनालाई कोरोना, संक्रमितको सख्या १८ पुग्यो

विराटनगर—विराटनगरस्थित नोबेल अस्पतालका एक जना डाक्टरसहित थप चार जनामा कोरोना संक्रमण पुष्टि भएको छ ।

मंगलबार १ चिकित्सक, १ नर्स र दुई जना फार्मेसीका कर्मचारीमा कोरोना संक्रमण देखिएको अस्पतालका प्रबन्धक नारायण दाहालले जानकारी दिए ।

थप चार जनामा कोरोना संक्रमण पुष्टि भएसँगै नोबेलमा संक्रमितको संख्या १८ जना पुगेको छ । यसअघि चार जना डाक्टर, ६ जना स्टाफ नर्स, २ जना अस्पतालका कर्मचारी, २ फार्मेसीका कर्मचारी रहेका छन् ।

हालसम्म अस्पतालमा कार्यरत स्वास्थ्यकर्मी र कर्मचारी गरी ५ सय ४८ स्वाब संकलन गरिएको अस्पतालले जनाएको छ । जसमध्ये ३ सय २४ जनाको रिपोर्ट आउन बाँकी रहेको अस्पतालका प्रबन्धक दाहालले जानकारी दिए ।