चिकित्सा शिक्षा आयोगमा चिकित्सकमाथि भएको दुर्व्यवहारप्रति गोदानको आपत्ति

काठमाडौं—सरकारी चिकित्सक संघ (गोदान)ले आफ्ना माग बुझाउन राष्ट्रिय चिकित्सा शिक्षा आयोग पुगेका चिकित्सकमाथि भएको दुर्व्यवहारप्रति आपत्ति प्रकट गरेको छ ।

सोमबार संघका अध्यक्ष डा. रविन खड्का र महासचिव डा.कीर्तिपाल सुवेदीद्वारा हस्ताक्षरित विज्ञप्तिमा गोदानले चिकित्सकमाथि प्रहरी बल प्रयोग लाठी र बुट चार्ज खेदपूर्ण भएको उल्लेख छ ।

संघले चिकित्सकको समूहमाथि भएको दुर्व्यहारप्रति गम्भीर ध्यानाकर्षण भएको जनाउँदैं आयोगको कार्यशैलीमा प्रश्न समेत उठाएको छ । ‘चिकित्सा शिक्षा आयोगको कार्यशैलीमाथि विभिन्न सरोकारवालाहरुको बारम्बार आपत्ति हुँदाहुँदै पनि आयोग भने एकलौटी निर्णय गर्दै अगाडि बढिरहेको छ,’ विज्ञप्तिमा छ, ‘त्यसमाथि हिजोको दमनले आयोगको जवाफदेहितामा नै प्रश्न उब्जाएको छ ।’

गोदानले सम्पूर्ण पीडित चिकित्सकको साथमा रहेको जनाउँदैं यथाशीघ्र कानुनी कारवाहीको माग समेत गरेको छ ।